Partia Mundësia do të dalë me kandidatët e saj në zgjedhjet lokale të pranverës së vitit 2027. Lajmin e ka dhënë kryetari i kësaj force politike Agron Shehaj, i cili përmes një video në rrjetet sociale fton këdo që ndien për të kontribuuar për të ardhmen e vendit, t’i bashkohet ekipit të “MUNDËSIA”.
“Ftojmë të gjithë shqiptarët të na bashkohen! Kushdo nga ju që do të përfaqësojë në mënyrë të ndershme, besnike dhe me dinjitet komunitetin e tij, qytetin e tij në Këshillin Bashkiak, është i ftuar t’i bashkohet Partisë Mundësia. Shqipëria, e ardhmja e Shqipërisë ka nevojë për kontributin e secilit prej nesh. Dhe Partia Mundësia është e hapur për këdo që do të japë kontributin e vet”, thekson ai.
Shehaj bën me dije se Partia Mundësia ka ndezur motorrët e përgatitjes së fushatës për vendoret 2027 dhe ka mbledhur strukturat për mobilizimin drejt zgjedhjeve që do e bëjnë këtë forcë politike që të ketë anëtarë në çdo këshill bashkiak në të gjithë Shqipërinë.
Kreu i Mundësia thekson se partia e ka derën e hapur për këdo që do të përfaqësojë në mënyrë të ndershme, besnike dhe me dinjitet komunitetin e tij.
“Ju presim sepse na pret një punë shumë e madhe. Se sa anëtarë do të kemi varet nga puna jonë dhe nga vota që qytetarët do të na besojnë”, e mbyll video-mesazhin Shehaj.
Deklarata e plotë e Shehajt:
Zgjedhjet vendore po afrohen! Partia Mundësia do të ketë për herë të parë anëtarë në çdo Këshill Bashkiak në të gjithë Shqipërinë. Bravo, Mundësia!
Ftojmë të gjithë shqiptarët të na bashkohen!
Kushdo nga ju që do të përfaqësojë në mënyrë të ndershme, besnike dhe me dinjitet komunitetin e tij, qytetin e tij në Këshillin Bashkiak, është i ftuar t’i bashkohet Partisë Mundësia. Shqipëria, e ardhmja e Shqipërisë ka nevojë për kontributin e secilit prej nesh. Dhe Partia Mundësia është e hapur për këdo që do të japë kontributin e vet. Ju presim sepse na pret një punë shumë e madhe. Se sa anëtarë do të kemi varet nga puna jonë dhe nga vota që qytetarët do të na besojnë.
