Në emisionin ‘Repolitix’ me gazetarin Denis Minga në Report Tv u diskutua mbi masën e sigurisë ‘arrest shtëpie’ të nxjerrë nga SPAK për drejtoreshën e Shërbimit Informativ Shtetëror, Vlora Hyseni.
Gjatë fjalës së tij, ish-prokurori Ervin Karanxha, duke iu referuar 2 akuzave të ngritura nga SPAK për Hysenin, “Nxjerrja e sekretit shtetëror” dhe “përkrahja e autorit të krimit të organizuar”, tha se dënimi për veprën e parë është deri në 5 vite, ndërsa për të dytën 2-7 vite.
Më tej Karanxha tha se SHISH ka bashkëpunuar edhe me organet e vettingut dhe sipas tij, me shkresa të zyrtarëve të këtij institucioni janë shkarkuar gjyqtarë e prokurorë.
“Kjo është çështje me fraksion. Çështja kryesore është ajo e AKSHI-t, që ka shumë persona nën hetim, por një nga fraksionet është edhe ky. Duke nisur nga akuzat, ligji thotë në mënyrë të qartë ‘zbulimi ndaj të tretëve i të dhënave’. Pra Vlora Hyseni ka zbuluar akte sekrete, që për shkak të detyrës së saj nuk duhet t’i nxirrte. Për mua pavarësisht se kjo akuzë është më e lehtë se ajo e ‘përkrahjes së autorit të krimit’, për mua kjo është më e rënda, për shkak të pozitës që Hyseni mban. ‘Përkrahja e autorit të krimit’ përmban dënim nga 2-7 vite burg. Zbulimi i akteve sekrete e ka dënimin deri në 5 vite burg. Mos të harrojmë që SHISH ka bashkëpunuar edhe me organet e vettingut dhe me shkresa të këtyre zyrtarëve, që i tregojnë dokumentat grupeve kriminale, janë shkarkuar gjyqtarë e prokurorë. Nga ana tjetër grupet kriminale janë certifikuar si të ligjshëm nga ana e këtyre organeve shtetërore”, tha mes të tjerash Karanxha.
Ndërkohë avokati Rezart Kthupi tha se pezullimi i një funksionari publik (siç veproi SPAK me Vlora Hysenin), duhet të vijë automatikisht për sa kohë që funksionari publik dyshohet për një vepër penale të kryer në ushtrim të funksionit.
Kthupi shtoi gjithashtu se pezullimin nga detyra të një funksionari publik e kërkojnë edhe Prokuroritë e rretheve dhe sipas tij, nuk është SPAK që po e bën për herë të parë.
Më tej Kthupi tha se kryeministri Edi Rama përdor një standard të dyfishtë kur thotë se ‘vlerësojmë punën e Vlora Hysenit, por drejtësia duhet të bëjë punën e vet’. Ai shtoi se Rama duhet të ‘ndajë shapin nga sheqeri’.
“Çështja e pezullimit të një funksionari publik duhet të vijë automatikisht për sa kohë funksionari publik dyshohet për një vepër penale të kryer në ushtrim të funksionit. Një nga kushtet kryesore që kërkojnë masat e sigurimit, është mos kryerja e të njëjtës vepër penale. Pra nëse ti ke bërë një vepër penale duke ushtruar funksionin publik, a ekziston rreziku që ti të kryesh një tjetër vepër penale në ushtrim të këtij funksioni. E kërkojnë edhe Prokuroritë e rretheve pezullimin, jo vetëm SPAK. Rama ka gjetur një standard prej kohësh që bën këtë dyzimin në koncepte. Duhet ndarë shapi nga sheqeri. Drejtësia duhet të bëjë punën e saj dhe ajo që i kërkohet kryeministrit është të mbajë përgjegjësi politike. Hyseni ka nisur punë si këshilltare personale e kryeministrit. Funksioni kryesor që ka SHISH është që të informojë kryeministrin dhe Presidentin në përditshmëri për gjendjen e sigurisë kombëtare të shtetit shqiptar. Personi që duhet të informonte kryeministrin për të gjitha çështjet që ndodhin në Shqipëri, nuk e ka bërë këtë”, tha Kthupi.
——————————-
Sqarim: Çdo person prezumohet i pafajshëm deri sa nuk vërtetohet fajësia e tij me vendim gjyqësor të formës së prerë
