Komisioni i Ligjeve ka nisur shqyrtimin e nismës për hartën e re territoriale të vendit, me Partinë Socialiste që kërkon të ecë përpara me variantin për 46 bashki, ndërsa PD ka paraqitur një variant alternativ që parashikon 100 bashki. Opozita kërkon që edhe kjo nismë t’i nënshtrohet një raundi konsultimi publik, duke kundërshtuar procedurën e ndjekur nga mazhoranca.
Deputeti Saimir Korreshi është përplasur me kreun e komisionit, Ulsi Manja, duke përdorur shpesh edhe ironinë mbi mënyrën dhe shpejtësinë me të cilën po trajtohet reforma.
Ai ngriti shqetësimin edhe për pasojat që mund të ketë ndryshimi i hartës administrative për qytetarët, veçanërisht në zonat ku distancat me qendrat e bashkive janë të mëdha.
Pjesë nga diskutimi:
Korreshi: Këtë punë tani do e bëjmë që të dalim në televizor?
Manja: Është seanca që dilet në televizor.
Korreshi: Shyqyr që paskam krehur balluket. Mund ta ndryshojmë rendin e ditës, nuk është ndonjë tabu e madhe. E keni bërë kalendarin si me qenë kalendari i Vitit të Ri, shkrep foton e nuk vjen më ai të pozojë. Paskeni qenë në komision ju e ne paskemi fjetur gjumë. Si i paskemi depozituar 401 faqe ne kur s’kemi qenë, pse byrek është ky? S’është byrek nga ata të ngrirët që i merr nga frigoriferi edhe i fut në sobë. Edhe Diellën të kishit sjellë, nuk i kishit bërë dot 401 faqe. Është bërë punë serioze.
Korreshi: ….Pres qafën nëse krerët e bashkive të kenë shkelur me këmbë territorin, do i kalojë kreu i bashkisë së madhe. Unë fshatar jam, merrem edhe me gardhin, shoku Ulsi.
Manja: Cili është propozimi final?
Korreshi: Fike pak televizorin se dua të dal unë në televizor, se jam më i bukur se ty. Propozimi, i nderuar shoku i fortlumturuar kombëtar, është të ndryshojmë rendin e ditës dhe të fusim propozimin e PD e të shqyrtohet. Futjen e ligjit tonë për procedurë.
