Mbi 150 aplikime për Paketën e Maleve dëshmojnë interesin e lartë të banorëve në Bashkinë Selenicë. Duke qenë se kjo bashki, në territorin e saj kodrinoro-malor, ofron mundësi të shumta zhvillimi, është rritur edhe interesi i vetë banorëve për të aplikuar.
Kryetari i Bashkisë Selenicë, Nertil Bellaj, ka konfirmuar ngritjen e një grupi pune për verifikimin e çdo aplikimi, së bashku me hartat përkatëse. Më pas, aplikimet do të dërgohen pranë Ministrisë së Pushtetit Vendor. Aktualisht janë evidentuar rreth 36 zona, por synohet që në vijim të përfshihet i gjithë territori në këtë mundësi zhvillimi, gjithmonë në përputhje me dokumentacionin përkatës të aplikuesve.
“Bashkia ka ngritur grupet e punës dhe është angazhuar që hap pas hapi t’i evidentojë, të bëjë hartat përkatëse dhe t’i aplikojë pranë Ministrisë së Pushtetit Vendor dhe të dalë VKM për të miratuar zonën me zhvillim. 36 zona i kemi evidentuar dhe shpresojmë që javën tjetër të dalë VKM për këto zona. Më pas është faza e dytë ku banorët që kanë shprehur interesin sjellin dokumentacionin që lidhin aplikuesin me pronën dhe shpallen si posedues. Në bazë të një projekti që bëjnë vetë, aplikojnë dhe sipas ligjit, është ministria dhe AZHT që u jep lejen dhe lidhet kontrata simbolike, 1 euro. Kjo pronë, pasi merr lejen e ndërtimit në AZHT duhet të përfundojë brenda 3 viteve ose nuk regjistrohet”, tha Bellaj.
Aplikimet e para kanë nisur në njësinë administrative të Bratajt, ku është shënuar edhe një fluks i lartë aplikimesh. Kjo lidhet me pasuritë natyrore që kjo zonë ofron, si dhe me faktin që disa biznese kanë nisur tashmë aktivitetin, duke dhënë shembull konkret të zhvillimit.
Bellaj ka theksuar se shpallja e zonave përcakton, në një farë mënyre, edhe tipologjinë e bizneseve që mund të zhvillohen. Fokusi kryesor pritet të jetë tek agroturizmi, fermat e vogla dhe bujtinat, të cilat do t’u japin më shumë zhvillim zonave.
“Bashkia, kur shpall zonën prioritare, shpall edhe tipologjinë e bizneseve që mund të zhvillohen. Kemi menduar që në këto zona ka të bëjë me agroturizmin, ferma të vogla bujqësore e blegtorale, bujtina familjare, fabrika të vogla bujqësore dhe aktivitete çlodhëse”, tha Bellaj.
Paketa e Maleve shihet si një mundësi shumë e mirë zhvillimi për Bashkinë Selenicë, ku numri i lartë i aplikimeve pritet të ndikojë pozitivisht në zhvillimin e zonave me karakter malor dhe kodrinor.
