Rusia ka kryer sulmin më të rëndë ndaj Ukraina gjatë këtij viti, duke lënë të paktën 17 të vrarë dhe mbi 100 të plagosur pas një vale masive sulmesh me dronë dhe raketa në disa qytete të vendit.
Goditjet prekën rëndë qytetet kryesore, përfshirë Odesa, ku humbën jetën nëntë persona, dhe kryeqytetin Kiev, ku u raportuan katër viktima, mes tyre edhe një djalë 12-vjeçar. Viktima u regjistruan gjithashtu në rajonin e Dnipropetrovsk dhe në Zaporizhzhia, shkruan Guardian.
Alarmet ajrore ranë rreth orës 02:30 të mëngjesit, ndërsa shpërthime të fuqishme u dëgjuan në Kiev, të shoqëruara nga kundërpërgjigjja e mbrojtjes ajrore ukrainase. Sipas forcave ajrore të Ukrainës, Rusia lëshoi afro 700 dronë dhe dhjetëra raketa balistike dhe lundruese.
Sulmet vijnë në një moment kritik për Ukrainën, pasi presidenti Volodymyr Zelensky ka paralajmëruar se vendi pothuajse ka shteruar raketat amerikane të sistemit Patriot.
“Situata është në një deficit ekstrem,” deklaroi ai më herët.
Që nga fillimi i pushtimit të plotë nga Vladimir Putin në vitin 2022, Rusia ka shënjestruar vazhdimisht infrastrukturën civile dhe energjetike të Ukrainës, duke shkaktuar ndërprerje të gjata të energjisë, sidomos gjatë dimrit.
