Presidentja e Parlamentit Europian, Roberta Metsola, ka vlerësuar vendin tonë si një nga më të avancuarit në procesin e integrimit në Bashkimi Evropian, njëjtë siç bëri komisionerja për zgjerimin Marta Kos dy ditë më parë.
Gjatë një debati për zgjerimin gjatë kësaj jave, Metsola nënvizoi se Shqipëria dhe Mali i Zi janë aktualisht në krye të procesit, dhe se fillimi i verës do të kërkojë shumë më tepër hapa për t’u ndërmarrë, por nga ana tjetër kritikoi faktin se ritmi i vendimmarrjes brenda BE-së nuk ka qenë në të njëjtin nivel me progresin e vendeve kandidate.
Ajo pranon frustrimin për faktin që prej vitit 2013 në Bashkimi Evropian s’ka hyrë asnjë vend i ri dhe fajësoi BE-në se po zvarrit procesin. Duke marrë si shembull faktin që liderët e BE-së takohen çdo 6 muaj, premtojnë hapa, por realisht nuk bëjnë progres, Metsola thotë se i vjen “turp” për këtë.
“Na është bërë pyetje për Ballkanin Perëndimor, dhe ata janë të frustruar, dhe nuk i fajësoj. Vendi i fundit që u anëtarësua ishte Kroacia në vitin 2013. Mali i Zi dhe Shqipëria janë në krye; fillimi i verës do të kërkojë shumë më tepër hapa për t’u ndërmarrë. Duhet të kemi parasysh që zgjedhjet dhe fushatat në secilin prej këtyre vendeve zhvillohen dhe fitohen mbi shpresën e anëtarësimit në BE. Ne marrim vite dhe takohemi çdo gjashtë muaj. Unë kam marrë pjesë në këto samite për katër vite, dhe çdo herë bëjmë një raund ku themi se zgjerimi është i mirë dhe se do të ndërmarrim hapin tjetër, dhe pastaj nuk bëjmë asgjë për gjashtë muaj. Më vjen turp t’u them këtyre liderëve se do të takohemi përsëri pas gjashtë muajsh dhe nuk kemi bërë asnjë progres. Pra, kapitull pas kapitulli, kufizimi ynë është se na duhet unanimitet për t’i hapur dhe unanimitet për t’i mbyllur, dhe ky është diskutimi që kemi tani: a na duhet vërtet unanimitet për t’i hapur? Nëse më pyesni mua, sot, në fund të ditës, bëhet fjalë për vullnet politik. U deshën 11 vite që të vendosnim t’i lejonim Bullgarinë dhe Rumaninë të bashkoheshin në zonën Shengen, 11 vite pasi Komisioni kishte vendosur se ato ishin gati. Le të jemi të sinqertë, ka vende që fshihen pas të tjerëve, kështu që duhet të jemi të hapur dhe të sinqertë për këtë. Nuk mund t’i shohim më këto vende në sy dhe të themi “po, po, po” publikisht dhe pastaj jo. Nuk mund t’u japim këtyre popujve shpresë të rreme” tha Metsola.
Dy ditë më parë, ishte pikërisht Komisionerja për Zgjerim e Bashkimit Europian, Marta Kos, e cila gjatë një interviste me BBC-në veçoi Shqipërinë si vendi që po përparon në mënyrë të qëndrueshme në procesin e anëtarësimit drejt bllokut 27-anëtarësh.
Kos theksoi se Shqipëria po ecën mirë në procesin e integrimit dhe shtoi se nëse vendet kandidate vijojnë me ritmin e reformave, gjatë mandatit të saj si komisionere pritet të ketë anëtarësime të reja në Bashkimin Evropian,
