Policia e Shtetit në zonën e Arezzo-s në Itali ekzekutoi pesë urdhër-arreste ndaj dy shtetasve shqiptarë dhe tre shtetasve italianë, të dyshuar për pjesëmarrje në një grup kriminal të përfshirë në trafik droge që drejtohej nga shqiptari.
Operacioni, i koduar “Minerva”, nisi të shtunën, më 18 prill, me urdhër të gjyqtarit hetues të Gjykatës së Arezzos, me kërkesë të Prokurorisë. Masat përfshijnë një arrest me burg dhe katër masa arresti shtëpiak.
Hetimi nisi në gusht 2025 dhe u zhvillua përmes një hetimi kompleks. Përgjimet telefonike dhe ambientale, si dhe shërbimet e vëzhgimit dhe ndjekjes, rezultuan vendimtare për zbardhjen e rrjetit.
Sipas hetimeve, grupi kriminal, i përbërë kryesisht nga shtetas italianë dhe i drejtuar nga një shtetas shqiptar, kishte ngritur një rrjet të organizuar shpërndarjeje kokaine, hashashi dhe marihuane në të gjithë provincën.
Organizata funksiononte me metoda të strukturuara: shitjet kryheshin çdo ditë, shpesh me shpërndarje në banesa përmes automjeteve të ndryshme. Përveç konsumatorëve, furnizoheshin edhe tregtarë të vegjël lokalë.
Hetimi zbuloi një ndarje të qartë rolesh. Grupi drejtohej nga një shtetas shqiptar, aktualisht në paraburgim, i mbështetur nga partnerja e tij, e cila ndodhet gjithashtu nën arrest shtëpiak.
Tre shtetasit italianë dyshohet se kanë vepruar si korrierë, përgjegjës për shpërndarjen e drogës, si dhe për paketimin dhe përgatitjen e dozave në vende të caktuara.
Gjatë hetimit, policia sekuestroi 750 gramë kokainë, 500 gramë hashash, 1 kilogram marihuanë, peshore precize dhe materiale paketimi, telefona celularë të përdorur për komunikim, 1,350 euro në para të gatshme, të dyshuara si të ardhura nga trafiku i drogës, ndërsa tre persona ishin arrestuar më herët në flagrancë gjatë fazave hetimore.
