Juventusi e ka identifikuar Alisson Becker si objektivin kryesor për portën për sezonin e ardhshëm dhe braziliani i ka dhënë tashmë miratimin personal një lëvizjeje të mundshme drejt Torinos.
Sipas gazetarëve Romano dhe Pedulla, një faktor i rëndësishëm në këtë pistë është lidhja mes Alissonit dhe trajnerit të Juventusit, Luciano Spalletti.
Ky i fundit ka punuar me portierin gjatë kohës te Roma dhe e njeh mirë profilin e tij, duke e vendosur në krye të listës së kandidatëve që janë përmendur javët e fundit. Mbështetja personale e Spallettit thuhet se i ka dhënë vrull operacionit.
Një hapësirë për Juventusin është krijuar edhe nga situata te Liverpooli. Klubi anglez ia ka zgjatur kontratën Alissonit edhe për një sezon, për të mos e humbur pa pagesë, por plani afatgjatë për portën lidhet me gjeorgjianin Giorgi Mamardashvili, i cili pritet të jetë zgjidhja kryesore në të ardhmen.
Kjo dinamikë e ka vendosur Alissonin në një rol tranzicioni në “Anfield”, dhe raportohet se ai është i gatshëm të nisë një kapitull të ri. Me miratimin e lojtarit në xhep, Juventusi pritet të hapë bisedime zyrtare me Liverpoolin në ditët në vijim, për të negociuar kushtet e transferimit.
Sa i përket kontratës, marrëveshja e mundshme parashikon që Alisson të firmosë ose dy vjet me opsion për të tretin, ose një kontratë të drejtpërdrejtë trevjeçare.
Në të dyja rastet, do të ishte një investim i fortë nga Juventusi dhe një sinjal i qartë për nivelin e përforcimeve që synon klubi këtë verë. /Telegrafi/
