Sezoni turistik detar në Durrës ka nisur zyrtarisht këtë të mërkurë, me mbërritjen e dy kroçierave të para në portin më të madh të vendit.
Anijet turistike “Monet” dhe “La belle de l’Adriatique”, vizitore të njohura të brigjeve shqiptare, kanë sjellë dhjetëra turistë nga vende të ndryshme, të cilët po vizitojnë qytetin dhe destinacionet përreth.
Korrespondentja e Top Channel Vali Qyrfyçi raporton se kroçera “La belle de l’Adriatique”, me flamur belg, mbërriti rreth mesditës me 95 pasagjerë dhe 49 anëtarë ekuipazhi.
Anija turistike erdhi nga porti i Igumenicës në Greqi dhe, pas një qëndrimi njëditor në Durrës, do të vijojë itinerarin drejt Dubrovnikut, në Kroaci. Ndërkohë, kroçera “MONET”, që lundron nën flamurin e Saint Vincent & Grenadines, mbërriti me turistët e saj mëngjesin e sotëm nga Kotori, Mali i Zi, dhe do të vazhdojë më tej drejt Vlorës.
Me nisjen e këtij sezoni, Durrësi rikonfirmon pozicionin e vet si një nga pikat kyç të turizmit detar në rajon, duke u përfshirë gjithnjë e më shumë në itineraret ndërkombëtare të kroçierave.
