Ministri i Jashtëm i Iranit, Abbas Araghchi, ka arritur gjatë natës në Islamabad, në një vizitë që përfshin një seri takimesh me zyrtarë të lartë pakistanezë, në një moment të ndjeshëm diplomatik për rajonin.
Para mbërritjes së tij, Shtëpia e Bardhë njoftoi se SHBA-ja kishte dërguar në Islamabad të dërguarit special Steve Witkoff dhe Jared Kushner, duke deklaruar se ky hap ishte ndërmarrë pasi pala iraniane kishte shprehur dëshirën për bisedime “ballë për ballë”.
Megjithatë, menjëherë pas këtyre njoftimeve, nga Teherani u dha një version tjetër i situatës. Zëdhënësi i Ministrisë së Jashtme të Iranit, Esmail Baqaei, sqaroi se vizita e Araghchit në Pakistan nuk përfshin asnjë takim me përfaqësues të Shteteve të Bashkuara.
Sipas tij, ministri iranian do të zhvillojë vetëm takime me “zyrtarë të lartë pakistanezë”, duke hedhur poshtë çdo mundësi për një kontakt të drejtpërdrejtë me palën amerikane gjatë kësaj vizite, shkruan skynews.
“Nuk është planifikuar asnjë takim midis Iranit dhe SHBA-së. Qëndrimet dhe mesazhet e Iranit do t’i përcillen përmes Pakistanit”, deklaroi Baqaei, duke theksuar se roli i Islamabadit mbetet ai i ndërmjetësit diplomatik.
Këto zhvillime tregojnë për një situatë të paqartë dhe të ndërlikuar në komunikimin mes Teheranit dhe Uashingtonit, ku mesazhet publike nga të dyja palët nuk përputhen plotësisht, duke lënë të hapura pyetje mbi mundësinë e një dialogu të drejtpërdrejtë në të ardhmen. /Telegrafi/
