Një person sot është arrestuar në Prishtinë, pasi ka tentuar të sulmojë disa persona në ceremoninë e prezantimit të muralit për nënë Ferdonije.
E zëdhënësja e Prokurorisë Themelore së Prishtinës. Kaltrina Shala në një prononcim për Telegrafin ka thënë se është prokurori i Shtetit ka iniciuar rastin në drejtim të veprën penale “Sulm”.
Sipas saj, po ndërmerren të gjitha masat dhe veprimet e nevojshme hetimore lidhur me këtë çështje penale.
“Ju njoftojmë se Prokurori i Shtetit ka inicuar rastin në drejtim të veprës penale ‘Sulmi’, nga neni 184 të Kodit Penal të Republikës së Kosovës. Prokurori i Shtetit është duke i ndërmarrë të gjitha masat dhe veprimet e nevojshme hetimore lidhur me këtë çështje penale”, ka thënë Shala.
Ndryshe, një person është arrestuar sot rreth orës 11:30 gjatë një ceremonie në rrugën “Dëshmorët e Kombit” pasi ka tentuar të sulmojë fizikisht disa persona.
Lajmin për Telegrafin e ka bërë të ditur zëdhënësi i Policisë së Kosovës për rajonin e Prishtinës, Enis Pllana.
Sipas tij, në vendin e ngjarjes kanë ndërhyrë zyrtarët policorë, të cilët kanë arrestuar personin e dyshuar.
“Sot, rreth orës 11:30, në rrugën ‘Dëshmorët e Kombit’ në Prishtinë, një person gjatë një ceremonie ka tentuar t’i sulmojë disa persona të tjerë. Në vendin e ngjarjes kanë ndërhyrë zyrtarët policorë, të cilët kanë arrestuar personin e dyshuar. Të gjitha veprimet e mëtejme do të ndërmerren në koordinim me Prokurorin e Shtetit”, ka thënë Pllana.
Ndërkaq, sipas pamjeve të mediave prezent ngjarja ka ndodhur gjatë prezantimit të muralit për nënën Ferdonije. /Telegrafi/
