Afati 60-ditor për Presidentin amerikan Donald Trump për të kërkuar miratimin e Kongresit për vazhdimin e operacioneve ushtarake kundër Iranit skadon sot, mes tensioneve të vazhdueshme në rajon dhe paralajmërimeve të ashpra nga Teherani.
Sipas Kushtetutës së SHBA-së, vetëm Kongresi ka të drejtën të shpallë luftë. Megjithatë, ligji i vitit 1973 për kompetencat e luftës i lejon presidentit të ndërmarrë operacione ushtarake të kufizuara në rast emergjence, por kërkon që brenda 60 ditësh të kërkohet miratim nga Kongresi, të ndërpriten operacionet ose të kërkohet një zgjatje 30-ditore për arsye sigurie.
Konflikti me Iranin nisi më 28 shkurt dhe administrata amerikane njoftoi Kongresin dy ditë më vonë. Megjithatë, zyrtarët e administratës argumentojnë se afati 60-ditor është pezulluar pas hyrjes në fuqi të armëpushimit më 8 prill. Sekretari i Mbrojtjes Pete Hegseth deklaroi se “armiqësitë kanë përfunduar”, duke theksuar mungesën e përplasjeve të drejtpërdrejta që prej 7 prillit.
Read more (Donald Trump):SHBA-ja dhe Venezuela rivendosin marrëdhëniet diplomatike/ Ulet me sukses fluturimi nga Miami në Karakas, i pari që nga viti 2019
Kjo qasje kundërshtohet nga demokratët. Udhëheqësi i shumicës në Senat, Chuck Schumer, u shpreh se afati nuk mund të pezullohet ndërsa trupat amerikane mbeten të ekspozuara ndaj rrezikut.
Ndërkohë, situata në terren mbetet e tensionuar. Ngushtica strategjike e Hormuzit vazhdon të jetë e mbyllur, duke shkaktuar rritje të ndjeshme të çmimeve globale të energjisë. Raportime të mediave sugjerojnë se administrata Trump po shqyrton opsione të ndryshme, përfshirë sulme të reja ajrore, kontroll të pjesshëm tokësor të ngushticës, apo edhe zgjerim të bllokadës ndaj porteve iraniane.
Read more (Irani):Trump shkakton debat me imazh për riemërtimin e Ngushticës së Hormuzit
Në të njëjtën kohë, po shqyrtohen edhe alternativa diplomatike, përfshirë krijimin e një koalicioni ndërkombëtar për të garantuar lirinë e lundrimit në Hormuz.
Nga ana tjetër, Irani ka paralajmëruar për pasoja të rënda në rast të një sulmi të ri. Një zyrtar i lartë i Gardës Revolucionare deklaroi se çdo veprim ushtarak amerikan do të sjellë “goditje afatgjata dhe të dhimbshme” ndaj interesave të SHBA-së në rajon. Edhe Udhëheqësi Suprem, Mojtaba Khamenei, theksoi se vendi do të mbrojë sovranitetin e tij dhe do të kontrollojë përdorimin e Ngushticës së Hormuzit.
Read more (Shba):Tragjedi familjare në SHBA, nëna kryen vetëvrasje pasi burri i vrau foshnjën
Sekretari i Përgjithshëm i OKB-së, António Guterres, paralajmëroi për pasoja serioze globale nëse bllokada vazhdon, duke përfshirë rritje të inflacionit dhe varfërisë në shkallë botërore.
Ndërkohë, Emiratet e Bashkuara Arabe u kanë bërë thirrje qytetarëve të tyre të shmangin udhëtimet drejt Iranit, Libanit dhe Irakut, duke reflektuar shqetësimet në rritje për sigurinë rajonale.
