3 mujori i parë i vitit 2026 ka rezultuar pozitiv për bizneset duke gjeneruar më shumë të ardhura krahasuar me një vit më parë.
Të dhënat e Ministrisë së Financave bëjnë të ditur se qarkullimi total i bizneseve gjatë kësaj periudhe arriti në 931 miliardë lekë 9.3 miliardë euro, duke shënuar një rritje prej 60.1 miliardë lekësh apo 600 mln euro krahasuar me të njëjtën periudhë të një viti më parë.
Vet ministria vë në dukje se kjo rritje është nxitur nga disa faktorë kryesorë, mes tyre forcimi i konsumit të brendshëm, performanca më e mirë e sektorit të shërbimeve dhe tregtisë, si dhe vijimi i formalizimit të ekonomisë, që ka sjellë deklarim më të saktë të xhirove nga bizneset.
Read more:Ekonomi
Të dhënat tregojnë gjithashtu zgjerim të tregut të sipërmarrjes. Numri i subjekteve aktive në vend ka arritur në 143,875, në rritje me rreth 5 për qind në krahasim me një vit më parë.
Por vetëm gjatë tre muajve të parë të vitit janë regjistruar 6,085 biznese të reja, 12 për qind më shumë se në të njëjtën periudhë të vitit 2025, një sinjal i shtimit të interesit për të hyrë në treg. Të bërit biznes po konsiderohet nga tregu vendas si një ndër mënyrat më të mira për të gjeneruar më shumë të ardhura.
Read more:Kurti i bën thirrje sektorit privat: Paga e 13-të të mos mbetet privilegj vetëm i sektorit publik
Kjo ecuri konfirmohet edhe nga raportet e Bankës së Shqipërisë. Performanca financiare e bizneseve paraqitet përgjithësisht pozitive. Shumica e tyre kanë operuar me fitim dhe kanë raportuar rritje të shitjeve, veçanërisht ndërmarrjet e mëdha dhe ato të sektorit të tregtisë.
Megjithatë, sfidat mbeten të pranishme. Bizneset përballen me konkurrencë të fortë, rritje të kostove të prodhimit dhe vështirësi në gjetjen dhe mbajtjen e fuqisë punëtore, faktorë që vijojnë të ndikojnë në aktivitetin e tyre. Ndërsa sprovë për bizneset në tremujorët e tjerë të vitit mbeten kostot e krijuara nga konflikti në Lindjen e mesme duke iu sjellë më shumë kosto në aktivitetin e tyre të përditshëm.
