Sekretari amerikan i Shtetit, Marco Rubio, ka deklaruar se ka përfunduar operacioni ushtarak i nisur në muajin shkurt kundër Iranit, duke sinjalizuar një ndryshim të qasjes së Uashingtonit drejt sigurimit të lëvizjes së lirë në Ngushticën e Hormuzit.
Gjatë një deklarate nga Shtëpia e Bardhë, Rubio tha se faza e operacionit të quajtur “Epic Fury” është mbyllur.
“Operacioni ka përfunduar… ne kemi mbaruar me atë fazë”, u shpreh ai, duke shtuar se tashmë vëmendja është përqendruar te një iniciativë e re, e quajtur “Project Freedom”, shkruan cnn.
Read more:Foto e fundit me Al e ndarë nga Trump – i buzëqeshur në pishinë duke shijuar rrezet e diellit
Sipas tij, kjo nismë synon të garantojë kalimin e sigurt të anijeve tregtare në një nga korridoret më të rëndësishme detare në botë, përmes të cilit kalon një pjesë e madhe e furnizimit global me energji.
Shtëpia e Bardhë njoftoi Kongresin javën e kaluar se armiqësitë kundër Iranit janë “përfunduar”, duke respektuar afatin 60-ditor që kërkon autorizim formal nga ligjvënësit për vijimin e operacioneve ushtarake.
Megjithatë, presidenti amerikan, Donald Trump nuk e ka përjashtuar mundësinë e rifillimit të sulmeve ajrore në rast se negociatat me Iranin dështojnë ose nëse shkelet armëpushimi aktual.
Read more:Irani tregoi se pse sulmoi sërish Emiratet e Bashkuara Arabe
Në të njëjtën kohë, çështjet kyçe që lidhen me programin bërthamor të Iranit, përfshirë rezervat e uraniumit të pasuruar në nivele të larta, pritet të trajtohen përmes negociatave diplomatike.
Rubio theksoi se çdo marrëveshje e mundshme duhet të adresojë jo vetëm pasurimin e uraniumit, por edhe fatin e materialeve ekzistuese, duke e cilësuar këtë si një çështje qendrore për sigurinë ndërkombëtare. /Telegrafi/
