Bangladeshi po përballet me shpërthimin më vdekjeprurës të fruthit në dy dekadat e fundit, me më shumë se 50 mijë raste të regjistruara dhe të paktën 320 viktima që nga muaji mars, duke vënë nën presion të madh sistemin shëndetësor të vendit.
Në Spitalin Sisou në Daka, repartet pediatrike janë të mbushura me fëmijë të sëmurë, ndërsa prindërit dhe familjarët përballen me ankth dhe pasiguri. Mjekët raportojnë raste të shumta të fëmijëve me probleme të rënda në frymëmarrje dhe komplikacione serioze nga virusi. Mes tyre është edhe 3-vjeçarja Afia, e cila nuk kishte marrë dozën e dytë të vaksinës kundër fruthit. Gjyshja e saj tregoi se vajza ishte në gjendje kritike dhe iu desh oksigjen për të mbijetuar.
Fruthi konsiderohet nga Organizata Botërore e Shëndetësisë si një nga sëmundjet më ngjitëse në botë, ndërsa viktimat janë kryesisht fëmijë të pavaksinuar nën moshën 5-vjeçare.
Read more:Konfirmimi i 8 rasteve me fruth në Kosovë, thirrje për vaksinim të menjëhershëm
Ekspertët në Bangladesh ia atribuojnë përhapjen e epidemisë kequshqyerjes, uljes së nivelit të vaksinimit dhe dobësimit të sistemit shëndetësor pas krizës politike të vitit 2024. Ndikim ka pasur edhe reduktimi i ndihmës amerikane për zhvillim, vendim i marrë nga administrata e Donald Trump.
Qeveria ka nisur një fushatë emergjente vaksinimi dhe deri tani janë vaksinuar rreth 17 milionë fëmijë që prej 5 prillit. Megjithatë, autoritetet pranojnë se rezultatet po vijnë ngadalë, ndërsa vetëm të hënën u regjistruan 17 vdekje brenda 24 orëve.
Ministri i Shëndetësisë, Abu Hossain Moinul Ahsan, deklaroi se objektivi është që niveli i vaksinimit të arrijë në 95% për të siguruar imunitetin e tufës.
Ndërkohë, ushtria ka ngritur një spital fushor me 20 shtretër pranë Spitalit Universitar të Dakës për të përballuar fluksin e pacientëve. Autoritetet druhen gjithashtu se vendi mund të përballet edhe me një valë të etheve dengue për shkak të shirave të fundit dhe shtimit të mushkonjave që transmetojnë virusin.
Read more:Real Madridi reagon për herë të parë pas përplasjes së Valverdes me Tchouamenin
