Inspektori i Lartë i Drejtësisë, Artur Metani deklaroi të mërkurën se prokurorët duhet të mbajnë përgjegjësi për çdo shkelje profesionale apo etike, ndërsa theksoi se pavarësia në sistemin e drejtësisë nuk mund të funksionojë pa llogaridhënie, integritet dhe profesionalizëm.
Deklaratat u bënë gjatë një takimi që Metani zhvilloi me përfaqësues të Shoqatës së Prokurorëve të Shqipërisë, të kryesuar nga prokurori Gëzim Spahiu. Në takim ishte e pranishme edhe Zëvendësinspektorja e Lartë e Drejtësisë, Elena Pelushi.
Gjatë bashkëbisedimit, palët diskutuan mbi rëndësinë e pavarësisë së prokurorëve si një nga shtyllat kryesore të shtetit të së drejtës dhe të funksionimit demokratik të institucioneve.
Read more:KLGJ dhe KLP përballen me kritika për vonesat e theksuara në vlerësimin e magjistratëve
Metani theksoi se prokurorët duhet të jenë të mbrojtur nga çdo ndërhyrje e padrejtë, por paralelisht me këtë duhet të japin llogari për mënyrën se si ushtrojnë detyrën.
“Prokurorët duhet të jenë të mbrojtur nga ndërhyrjet e padrejta, por njëkohësisht të mbajnë përgjegjësi për shkeljet profesionale ose etike. Vetëm përmes këtij ekuilibri mund të ndërtohet një sistem drejtësie i besueshëm, transparent dhe në shërbim të interesit publik”, u shpreh ai.
Në takim u nënvizua gjithashtu se pavarësia duhet të ecë paralelisht me përgjegjësinë, profesionalizmin, integritetin dhe llogaridhënien ndaj qytetarëve dhe institucioneve. Pjesë e diskutimeve ishte edhe besimi i publikut te drejtësia që sipas palëve, forcohet përmes hetimeve të paanshme, zbatimit të ligjit dhe transparencës institucionale.
Nga ana e tij, kreu i Shoqatës së Prokurorëve, Gëzim Spahiu, prezantoi objektivat e organizatës së krijuar në dhjetor 2025, e cila synon të shërbejë si strukturë për trajtimin e çështjeve që lidhen me statusin dhe funksionin e prokurorëve në Shqipëri.
Palët ranë dakord të vijojnë dialogun dhe bashkëpunimin për forcimin e sistemit të drejtësisë dhe rritjen e besimit publik.
