Presidenti i Real Madridit, Florentino Perez, raportohet se tentoi t’i motivonte maksimalisht lojtarët para ndeshjes së kthimit të çerekfinaleve të Ligës së Kampionëve ndaj Bayern Munich, duke u ofruar një bonus të jashtëzakonshëm nëse skuadra do ta siguronte kualifikimin.
Sipas gazetës spanjolle AS, Perez u kishte premtuar futbollistëve nga 500 mijë euro bruto secilit në rast se Reali do të kalonte në gjysmëfinale.
Për krahasim, lojtarët e “Los Blancos” kishin përfituar rreth 900 mijë euro bruto për triumfin në Ligën e Kampionëve dy vjet më parë.
Read more:PSG-ja përgatitet për befasinë e madhe të verës, nis kontaktet e para me yllin e Real Madridit
AS thekson se vendimi për një bonus kaq të lartë vetëm për arritjen në gjysmëfinale erdhi sepse Liga e Kampionëve konsiderohej shpresa e fundit e Real Madridit për të fituar trofe këtë sezon. Perez kërkoi t’i jepte një shtysë shtesë ekipit, sidomos pas humbjes 1-2 në ndeshjen e parë në shtëpi.
Ndeshja në Mynih si “finale”
Edhe pse zyrtarisht ishte vetëm ndeshja e dytë e çerekfinales, përplasja në Mynih u përjetua si një ndeshje “gjithçka ose asgjë”. Sipas raportimit, drejtuesit e Realit e kuptonin se skuadra kishte nevojë për një motivim ekstra për të qëndruar në garë, ndaj u rikthyen te një metodë që dikur ishte shumë e përdorur – bonuset e mëdha të menjëhershme, të cilat vitet e fundit janë bërë më të rralla.
Read more:Kush është Enrique Riquelme, emri surprizë që po hyn në lojë për president të Real Madridit?
Edhe financiarisht kishte peshë të madhe Sipas AS, arritja në gjysmëfinale do t’i sillte Real Madridit rreth 15 milionë euro shtesë nga çmimet e UEFA-s, plus të ardhura të ngjashme nga shitja e biletave, pasi buxheti minimal i planifikuar në klub thuhet se ishte ndërtuar mbi objektivin “çerekfinale”.
Në fund, as motivimi financiar nuk mjaftoi. Real Madridi u eliminua edhe në ndeshjen e kthimit në Mynih, duke humbur 3-4, dhe kështu lojtarët jo vetëm që mbetën pa gjysmëfinale, por edhe humbën bonusin e madh që u ishte ofruar si nxitje. /Telegrafi/
