Lidhja Demokratike e Kosovës (LDK) ka dënuar atë që e ka quajtur “dhunë e sotme politike”, duke shprehur shqetësim për, siç thuhet, klimën e rrezikshme të gjuhës së urrejtjes, kërcënimeve dhe “terrorizmit digjital” që po e rëndojnë debatin publik në vend.
Reagimi i LDK-së vjen pas incidentit të ndodhur në Skenderaj, ku ndodhi një incident mes kryetarit të Komunës së Skenderajt, Sami Lushtaku, dhe kryetarit të LVV-së në Skenderaj, Hysni Mehani.
LDK, megjithatë, në reagimin e saj nuk i ka përmendur me emër palët e përfshira.
Read more:Lista zyrtare e kandidatëve të LDK-së për deputetë
Në deklaratë, LDK thekson se retorika përçarëse dhe nxitëse e normalizuar në hapësirën publike dhe digjitale nuk mund të trajtohet si fenomen i zakonshëm politik, pasi, sipas saj, gjuha e urrejtjes rrit tensionet dhe cenon sigurinë publike.
“Retorika përçarëse, nxitëse dhe denigruese që është normalizuar në hapësirën publike e digjitale nuk mund të trajtohet si fenomen i zakonshëm politik. Gjuha e urrejtjes prodhon tension, cenon sigurinë publike dhe krijon ambient ku dhuna rrezikon të shihet si mjet i pranueshëm i përballjes politike”, thuhet në reagimin e LDK-së.
Read more:Këta janë disa nga kandidatët e rinj në listën e LDK‑së për deputetë në zgjedhjet e 7 qershorit
Partia opozitare vlerëson se mospajtimet politike duhet të mbeten brenda normave demokratike, institucionale dhe qytetare, duke nënvizuar se Kosova ka nevojë për debat dhe garë të ideve, e jo për “linçim, frikësim apo sulme ndaj kundërshtarit politik”.
“Republika jonë ka nevojë për debat politik, për garë të ideve dhe vizioneve, jo për linçim, frikësim apo sulme ndaj kundërshtarit politik”, thuhet më tej.
Read more:Debat në Skenderaj pas mbylljes së një biznesi, VV akuzon – Inspektorati mohon motivin politik
LDK u ka bërë thirrje akterëve politikë, institucioneve përgjegjëse dhe shoqërisë që të kontribuojnë në ruajtjen e një klime të qetë demokratike, në respektimin e kulturës së komunikimit publik dhe në mbrojtjen e rendit demokratik.
Në fund, LDK ka kërkuar që çdo akt dhune, gjuhë urrejtjeje dhe përpjekje për intimidim politik të refuzohet “qartë dhe pa ekuivok”, duke theksuar nevojën për maturi politike, përgjegjësi shtetërore dhe sundim të ligjit. /Telegrafi/
