Arne Slot ka këmbëngulur se pret të qëndrojë në stolin e Liverpoolit edhe sezonin e ardhshëm, pavarësisht një fushate zhgënjyese ku “Të Kuqtë” kanë pasur vështirësi ta mbrojnë kurorën e Ligës Premier.
Holandezi është përballur me presion në rritje nga një pjesë e tifozëve në “Anfield”, ndërsa skuadra po lufton për të siguruar një vend në Ligën e Kampionëve.
Slot ka shprehur bindjen se do ta udhëheqë klubin edhe në sezonin e ardhshëm, pavarësisht rënies së ndjeshme të formës në kampionat. Pas një sezoni debutues sensacional, ku fitoi titullin e Ligës Premier, këtë sezon ekipi i tij ka pësuar 11 humbje në ligë, gjë që ka sjellë pakënaqësi të dukshme nga tribunat.
“Nuk mendoj se këtë vendim e marr vetëm unë, por kam çdo arsye të besoj se do të jem trajner i Liverpoolit sezonin e ardhshëm”, u shpreh ai.
Read more:Lëvizje të mëdha te Liverpooli, të paktën pesë lojtarë pritet të largohen në verë
“Së pari, kam kontratë me këtë klub dhe, së dyti, nga të gjitha bisedat që po zhvillojmë. Kjo është mënyra si e shoh unë”.
Trajneri ishte i sinqertë në vlerësimin e nivelit të paraqitjeve të skuadrës krahasuar me sezonin e kaluar.
“Por nëse nuk e ke sezonin më të mirë, sidomos kur e krahason me sezonin e kaluar… nëse e krahason me sezone të tjera, mund të kesh një debat tjetër, por nëse e krahason me sezonin e kaluar, ky patjetër që nuk ka qenë një sezon i mirë; atëherë është normale që të ketë kritika”, pranoi Slot.
Ndërkohë, edhe pse raportimet sugjerojnë se pronarët dhe drejtuesit e klubit nuk e kanë konsideruar një ndryshim në pankinë, atmosfera rreth klubit ka ndryshuar.
Slot beson se vëmendja dhe presioni që po ushtrohen aktualisht mbi stafin dhe lojtarët janë thjesht pjesë e realitetit kur drejton një klub me peshën dhe madhësinë e Liverpoolit.
