Modelja hungareze, Barbara Palvin, është në pritje të fëmijës së saj të parë me bashkëshortin, Dylan Sprouse.
Ajo ndau lajmin e lumtur gjatë paraqitjes së tyre në tapetin e kuq të Cannes Film Festival, ku u shfaq me barkun e rrumbullakosur të shtatzënisë.
Palvin tërhoqi vëmendjen me një fustan blu të hapur që i theksonte barkun, ndërsa Sprouse u paraqit elegant me smoking të zi.
Çifti pozoi i buzëqeshur para fotografëve, me aktorin që e mbante modelen pranë vetes gjatë gjithë momentit në tapetin e kuq.
Dyshja u njoh në vitin 2017 dhe nisën lidhjen një vit më vonë. Në një intervistë të hershme për Vogue Australia, Palvin ishte shprehur se ndihej me fat që kishte gjetur burrin e përsosur.
Çifti kurorëzoi dashurinë me martesë në Hungari në vitin 2023. Gjatë viteve të lidhjes, ata kanë folur shpesh për mbështetjen që i japin njëri-tjetrit dhe për përpjekjet që të mos qëndrojnë larg për periudha të gjata për shkak të angazhimeve profesionale.
Vitin e kaluar, Palvin zbuloi publikisht se ishte operuar për Endometriosis, pasi për vite me radhë kishte përjetuar dhimbje të forta, lodhje dhe çrregullime të ciklit menstrual.
Ajo tregoi se për një kohë të gjatë kishte menduar se simptomat ishin normale, derisa vendosi të konsultohej me specialistë.
Modelja theksoi se ndërhyrja kirurgjikale e ndihmoi shumë dhe apeloi për rëndësinë e diagnostikimit të hershëm, duke shtuar se tani kujdeset më shumë për shëndetin dhe mirëqenien e saj. /Telegrafi/
