Polonia, një nga aleatët më të ngushtë të SHBA-së në Evropë, është shprehur e befasuar pas vendimit të shefit të Pentagonit, Pete Hegseth, për të anuluar vendosjen e planifikuar të 4,000 trupave amerikane në vend.
Qeveria polake ka reaguar duke theksuar se ky hap nuk përbën rrezik të menjëhershëm për sigurinë kombëtare dhe se bashkëpunimi me Shtetet e Bashkuara mbetet i fortë. Ministri i Mbrojtjes, Władysław Kosiniak-Kamysz, deklaroi se aleanca polako-amerikane është “e qëndrueshme dhe e fortë”, duke shtuar se Polonia mbetet “aleati më i besueshëm i SHBA-së në Evropë”. Sipas tij, Varshava është në kontakt të vazhdueshëm me palën amerikane dhe ka marrë garanci se nuk ka plan për ulje sistematike të pranisë ushtarake amerikane në vend.
Zëvendësministri i Mbrojtjes, Paweł Zalewski, tha se autoritetet amerikane kanë siguruar se nuk synohet reduktim i pranisë së trupave në Poloni, ndërsa shtoi se vendi vazhdon të mbetet një partner kyç i NATO-s.
Read more:Gjermania, Belgjika, Lituania, San Marino dhe Polonia në Eurovision – mbyllet gjysmëfinalja e parë
Megjithatë, vendimi ka shkaktuar shqetësim në Varshavë, pasi njësia e planifikuar për dislokim kishte nisur tashmë përgatitjet për transferim në Evropë. Pentagoni ka deklaruar se vendimi nuk ishte i papritur dhe as i marrë në moment të fundit.
Në Poloni, tërheqja e mundshme e trupave shihet me vëmendje të shtuar për shkak të shqetësimeve të sigurisë nga Rusia. Edhe pse vendi shpenzon një nga përqindjet më të larta të PBB-së për mbrojtje në NATO, prania e trupave amerikane konsiderohet thelbësore për sigurinë kombëtare. Zyrtarët polakë theksojnë se aktualisht rreth 500 trupa amerikane janë të stacionuara përgjithmonë në vend, ndërsa deri në 10,000 të tjerë lëvizin me rotacion. Qeveria ka bërë të ditur se nuk ka ulje të numrit të përgjithshëm të forcave amerikane dhe se po punohet për forcimin e mëtejshëm të bashkëpunimit ushtarak.
Ndërkohë, analistët paralajmërojnë se vendime të papritura në lidhje me dislokimin e trupave mund të krijojnë pasiguri mes aleatëve europianë dhe të ndikojnë në besueshmërinë e SHBA-së në rajon.
