SARANDË– Një ndërtim pa leje në buzë të detit, për një stacion plazhi me beach bar, çoi në shkrirjen e Policisë së Sarandës. Shefi i komisariatit, Gëzim Bashllari dhe 3 inspektorë, Andi Duro, Ajdin Ismailaj dhe Robert Çullaj u ndaluan nga butë pasi dyshohet se kanë shpërdoruar detyrën duke favorizuar këtë ndërtim pa leje, pas të cilit dyshohet se fshihet se një bandë kriminale me bazë në Kamëz.
Kjo bandë, dyshohet se i ka dhënë ryshfete të të majme te drejtuesit të policisë lokale që të lejonin ndërtimin pa leje të këtij stacioni plazhi të ndodhur në lagjen numër 1 në Sarandë, ose në zonën e njohur si kanali i Çukës. Këtë pronë dyshohet se synonte edhe Isuf Jacaj, i ekzkeutuar me tritol në 2025-ën, por që i është marrë me dhunë nga ky grup kriminal. Këta të fundit, biznesin dyshohet ta kenë vënë në emër të Arjola Dhrami Bajo prej 2022-shit, e cila është e shpallur në kërkim për ndërtim pa leje.
Pas kësaj ngjarje, dyshohet se lidhet me një seri krimesh që kanë tronditur qytetin bregdetar muajt e fundit. Mes tyre edhe ekzekutimi i Jacajt, një tentativë për t’i vrarë të birin me tritol dhe një tjetër konflikt me armë i djalit, Klaus Jaçaj, pas një sherri për tokën në bregdet me 2 të rinj nga Kamza, Gëzim Hajdaraj dhe Ernest Lami.
I gjithë ky aksion nisi pas një denoncimi të mbërritur në Policinë e Shtetit, për ndërtimin pa leje të beach-baritnë lagjen numër 1 në Sarandë, që çoi në arrestimin e 8 punëtorëve dhe shpalljen në kërkim të pronares Arjola Dhrami Bajo. Për këtë ndërtim, Policia e Shtetit njoftoi shërbimet e IKMT-së, IMT-së dhe Policisë Bashkiake, të cilat kryen prishjen e ndërtimeve.
Ishte kryepolici Skënder Hita që njoftoi Agjencinë e Mbikëqyrjes Policore dhe, në bashkëpunim me Prokurorinë e Sarandës, vijuan veprimet për nxjerrjen e përgjegjësive për punonjësit e policisë, të cilët nuk kishin kryer detyrën për moslejimin e këtij ndërtimi.
AMP bëri ndalimin e shefit të Komisariatit dhe 3 inspektorëve, të cilët akuzohen për “Shpërdorim detyre”, “Kryerja e veprimeve arbitrare” dhe “Mosmarrja e masave për të ndërprerë gjendjen e paligjshme”, vepra këto të kryera në bashkëpunim, jo vetëm për këtë rast, por edhe të tjera. Pas aksionit, Hita i ka pezulluar nga detyra katër punonjësit dhe ka nisur procedurat për përjashtimin e tyre nga Policia e Shtetit.
Po ashtu, Hita ka pezulluar menjëherë nga detyra dhe Shefin e Seksionit për Hetimin e Krimeve në Volum në Komisariatin e Policisë Sarandë, Komisar Blerim Tafçiu, pasi nuk është paraqitur për tu marrë në pyetje gjatë veprimeve hetimore që po kryhen nga Agjencia e Mbikëqyrjes Policore
Foto si dukej Beach-Bari
——————————-
Sqarim: Çdo person prezumohet i pafajshëm deri sa nuk vërtetohet fajësia e tij me vendim gjyqësor të formës së prerë
Beach bari pa leje i bandave në Sarandë/ Shefi i komisariatit justifikon veten: Isha i zënë me vrasjen e një biznesmeni, s’kam pasur kohë të merrem me këtë
Shefi i Komisariatit i Sarandës, tashmë i arrestuar, Gëzim Bashllari, përpara hetuesve të AMP-së ka deklaruar se ka qenë i zënë këtë javë me vrasjen në Sarandë, ndaj nuk ka pasur kohë të merret me ndërtimet pa leje, raporton gazetari i Report Tv Sokol Dema.
Ndërtimet pa leje në Sarandë, ja cili është beach bari i famshëm që ka çuar në përplasje kriminale
‘CopaCabana Saranda’ është beach bar-i dhe stacioni i plazhit në Kanalin e Çukës në Sarandë, pronë e cila ka çuar në shkarkimin e kupolës drejtuese të policisë së qytetit për shkak të ndërtimeve pa leje si dhe në përplasje kriminale.
Ky lokal rezulton të jetë në pronësi të Arjola Dhrami Bajos që prej 2022, ndërkohë që dyshohet se kjo pronë t’i përkiste dhe Isuf Jaçajt, i ekzekutuar me tritol në 2025-ën dhe se kjo tokë t’i jetë marrë me forcë nga një grup kriminal me bazë në Kamëz.
Saga e krimeve që fshihet pas ndërtimeve pa leje në Sarandë/ Prona ishte e Isuf Jaçajt, i ekzekutuar me tritol! Kupola e policisë mori ryshfet nga bandat
Isuf Jaçaj
Ndërtimi pa leje i zbuluar nga policia të enjten në Sarandë dyshohet se lidhet me një seri ngjarjesh kriminale që kanë tronditur qytetin muajt e fundit. Sipas burimeve pranë policisë për gazetarin e Report Tv Sokol Dema, prona ku po kryheshin punimet rezulton të ketë qenë në emër të Isuf Jaçajt, i cili mbeti i vrarë pas një shpërthimi me tritol në automjetin e tij në tetor të vitit 2025.
Hetuesit dyshojnë se pas atentatit mund të qëndroj një grup kriminal me bazë në Kamëz, i cili po verifikohet edhe për përfshirje në episode të tjera kriminale në Sarandë. Në pronën që dyshohet se ishte marrë me forcë nga ky grup, po ndërtohej një beach bar që synohej të vihej në funksion gjatë sezonit turistik.
Read more:eBay refuzon ofertën 56 miliardë dollarëshe të Game Stop
Për lejimin e ndërtimit, dyshohet se janë dhënë ryshfete ndaj drejtuesve lokalë të policisë. Për këtë çështje, Agjencia e Mbikëqyrjes Policore ka ndaluar shefin e Komisariatit të Policisë Sarandë, si dhe tre vartës të tij, të dyshuar për shpërdorim detyre dhe përfshirje në skemën korruptive që lejoi vijimin e punimeve.
Drejtuesit e policisë së Sarandës ‘njësh’ me krimin! Lamallari: Kush shkel ligjin ‘të heqë uniformën’
Për shkrirjen e komisariatit të Sarandës, nën dyshimet se drejtuesit kanë favorizuar ndërtime pa leje, përfshirë dyshimet se subjektet janë të lidhur me krimin, ministri i Brendshëm Besfort Lamallari, tha se në radhët e policisë nuk ka vend për askënd që bëhet palë me shkelësit e ligjit e që bashkëpunon me element kriminalë.
Në reagimin e tij, Lamallari theksoi se në radhët e Policisë së Shtetit nuk do të ketë vend për askënd që bëhet palë me shkelësit e ligjit apo që tradhton besimin e qytetarëve.
“Në Policinë e Shtetit nuk ka dhe nuk do të ketë vend për askënd që bëhet palë me shkelësit e ligjit, që abuzon me detyrën apo bashkëpunon me elementë kriminalë. E përshëndes me respekt operacionin në Sarandë, ku Agjencia e Mbikëqyrjes Policore dhe vetë Policia e Shtetit, bashkëvepruan për të arrestuar drejtues e punonjës policie të bërë njësh me shkelësit e ligjit.
Kjo provë vullneti për të pastruar radhët e Policisë së Shtetit nga çdo element që cënon ligjin dhe besimin e publikut, nuk është e para dhe nuk do të jetë as e fundit. Në çdo rast abuzimi, që nga symbyllja përpara ndërtimeve pa leje deri tek kompromisi me elementët kriminalë, reagimi do të jete me zero tolerancë. Efektivët që tradhtojnë popullin dhe abuzojnë me detyrën, do të identifikohen, goditen dhe përballen me drejtësinë. Përgëzime dhe kurajo lidershipit të ri të Agjencisë së Mbikqyrjes Policore dhe Policisë së Shtetit. Asnjë hap mbrapa”, shkroi Lamallari.
