Brigitte Macron dhe bashkëshorti i saj, Emmanuel Macron, janë rikthyer në qendër të vëmendjes pas publikimit të librit “Un Couple (Presque) Parfait”, një biografi e re nga gazetari Florian Tardif, e cila hedh dritë mbi marrëdhënien e tyre personale dhe jetën brenda Pallatit Elysee.
Libri paraqet një tablo të një martese të mbushur me tensione, xhelozi dhe ndikim të fortë të Zonjës së Parë në jetën politike dhe personale të Presidentit francez. Sipas autorit, Brigitte Macron, 73 vjeç, i konsideron gratë përreth bashkëshortit të saj si “grabitqare” dhe thuhet se kontrollon personalisht kandidatet femra që aplikojnë për punë në Pallatin Elysee.
Sipas pretendimeve të librit, Zonja e Parë kërkon të shohë fotografitë e çdo gruaje që aplikon për poste pranë presidencës franceze dhe në disa raste ka vendosur vetë nëse ato duhet të punësohen apo jo. Florian Tardif përshkruan një atmosferë ku xhelozia dhe pasiguria personale ndikojnë edhe në vendimmarrje brenda presidencës.
Në një darkë private vitin e kaluar, Brigitte Macron thuhet se u ka rrëfyer miqve të saj: “Kam frikë. Kam frikë se pas gjithë kësaj, ai mund të më lërë”, një deklaratë që sipas autorit tregon pasiguritë e saj lidhur me diferencën e madhe në moshë me Presidentin francez, i cili është 25 vite më i ri.
Libri ndalet edhe tek raporti i afërt dhe ndikimi i Brigitte Macron mbi Emmanuel Macron që prej fillimit të karrierës së tij politike. Sipas Tardif, Presidenti francez ua ka bërë të qartë bashkëpunëtorëve të tij se lumturia e bashkëshortes ishte thelbësore për suksesin e mandatit të tij presidencial.
🇫🇷 Emmanuel Macron aurait entretenu durant plusieurs mois une “relation platonique” avec l’actrice iranienne Golshifteh Farahani, avec des “messages qui seraient allés assez loin”, provoquant des tensions au sein du couple présidentiel, qui auraient conduit à la gifle. (via… https://t.co/m6XmotilkU pic.twitter.com/X27GxT5FDH
“Brigitte duhet të jetë e lumtur. Nëse ajo ndihet e pakënaqur, unë nuk do ta përballoj dot dhe do të dështoj në mandatin tim”, citohet të ketë thënë Macron pas marrjes së presidencës në vitin 2017.
Një pjesë e rëndësishme e biografisë fokusohet edhe në thashethemet që kanë shoqëruar Presidentin francez gjatë viteve të fundit. Emmanuel Macron është përfolur vazhdimisht për marrëdhënie të mundshme romantike, pretendime që ai i ka mohuar kategorikisht, duke i cilësuar si “thashetheme” dhe “skenarë të pabazë”.
Në libër përmendet edhe incidenti që bëri bujë ndërkombëtare gjatë një vizite zyrtare në Vietnam, kur kamerat filmuan një moment të sikletshëm mes çiftit presidencial pranë avionit zyrtar francez. Sipas autorit, Brigitte Macron reagoi ashpër ndaj bashkëshortit pas një mesazhi video të shfaqur në telefonin e Presidentit, ndërsa pamjet u komentuan gjerësisht në mediat ndërkombëtare.
Florian Tardif rikthen gjithashtu në vëmendje fillimin e marrëdhënies së çiftit presidencial, kur Emmanuel Macron ishte vetëm 15 vjeç dhe Brigitte 40 vjeçe, e martuar dhe me tre fëmijë. Ata u njohën në shkollën “La Providence” në Amiens, ku Brigitte ishte mësuesja e tij.
Pavarësisht polemikave dhe thashethemeve që kanë shoqëruar marrëdhënien e tyre ndër vite, autori e përshkruan Brigitte Macron si figurën më të rëndësishme në jetën e Presidentit francez dhe “spirancën” që e mban atë të qëndrueshëm politikisht.
Sipas biografisë, ndikimi i saj në Pallatin Elysee mbetet i paprekur dhe shtrihet nga marrëdhëniet personale të Presidentit deri te zgjedhjet politike dhe emërimet në nivelet më të larta të qeverisë franceze.
Libri “Un Couple (Presque) Parfait” pritet të ndezë debate të forta në Francë, pasi sjell detaje të panjohura më parë për jetën private të çiftit presidencial dhe atmosferën brenda Pallatit Elysee.
