Kryeministri izraelit Benjamin Netanyahu tha të enjten se i kishte dhënë urdhër ushtrisë izraelite të merrte mbi 70% të territorit të Gazës.
Gjatë një interviste në një konferencë në Bregun Perëndimor të pushtuar, Netanyahu tha se Izraeli po e “forcon” kontrollin mbi Hamasin.
“Tani jemi në 60% të territorit të Rripit të Gazës. Ishim në 50%, kaluam në 60%. Direktiva ime është të lëvizim drejt, hap pas hapi, para së gjithash drejt 70%. Le të fillojmë me këtë”, tha ai.
Ndërsa Netanyahu fliste, publiku i bëri thirrje atij të merrte kontrollin e të gjithë territorit të Gazës.
Forcat Mbrojtëse të Izraelit (IDF) u lëshuan harta grupeve ndërkombëtare të ndihmës në fund të prillit, të cilat tregonin tashmë se ushtria kontrollonte afërsisht 64% të Gazës.
Pushtimi i më shumë territorit të Gazës do të detyronte afërsisht 2 milionë palestinezë të jetonin në një pjesë gjithnjë e më të vogël të territorit të shkatërruar të enklavës bregdetare.
Sipas marrëveshjes së armëpushimit të tetorit 2025 midis Izraelit dhe Hamasit, forcat izraelite u tërhoqën në një vijë demarkacioni të njohur si “vija e verdhë” e cila përfshinte afërsisht 53% të Gazës.
Të martën, Hamasi akuzoi Izraelin për zhvendosjen e vijës, duke thënë se kjo “përbën një minim të qartë dhe të vazhdueshëm të marrëveshjes së armëpushimit, një shkelje serioze të dispozitave të saj dhe një përpjekje të hapur për të imponuar fakte të reja në terren me forcë, me qëllim forcimin e kontrollit ushtarak mbi Rripin e Gazës dhe minimin e çdo shansi real për stabilizimin e situatës ose për të bërë që përpjekjet për deeskalim të kenë sukses”.
