Gjykata e Posaçme ka verifikuar masat e sigurisë për personat e arrestuar në kuadër të hetimeve për pastrim parash, një operacion i zhvilluar në bashkëpunim me autoritetet italiane dhe që lidhet me grupin e Igli Kamberit.
Sipas dosjes hetimore të siguruar nga gazetarja Anila Hoxha për Top Channel, hetimet kanë zbuluar një skemë të sofistikuar të transportimit të parave të përfituara nga trafiku i lëndëve narkotike.
Sipas prokurorëve, shumat e mëdha të parave lëviznin përmes shoferëve të transportit ndërkombëtar, me qëllim shmangien e dokumentimit dhe kontrolleve doganore, duke vështirësuar gjurmimin e origjinës së tyre dhe shmangien e detyrimeve ligjore për deklarim.
Në dosje theksohet se metoda mbështetej tek besimi i krijuar mes pronarëve të parave dhe shoferëve të autobusëve apo kamionëve të identifikuar nga grupi kriminal. Sipas hetimeve, bashkëpunimi mes tyre ka qenë i vazhdueshëm dhe i organizuar, ndërsa shoferët përfitonin një përqindje të caktuar për transportimin e shumave monetare dhe rrezikun që merrnin përsipër.
Një nga episodet kryesore të dokumentuara nga hetuesit lidhet me datën 22 tetor 2024, kur është regjistruar dorëzimi i një sasie të madhe parash cash të fshehura në dy çanta me rroba të përdorura. Paratë iu dorëzuan një shoferi shqiptar kamioni, i identifikuar si Sokol Fusha, nga shtetasja italiane Annamaria Lamia Caputo.
Sipas dosjes, automjeti FORD C-Max me targë DK447LA, i përdorur nga Caputo, ishte nën mbikëqyrje audio dhe video. Pamjet e marra në një pikë karburanti në autostradën SS100 në Itali kanë dokumentuar takimin dhe kanë lidhur lëvizjen e parave me aktivitetin e grupit kriminal nën hetim.
Hetuesit kanë zbuluar gjithashtu se gjatë lëvizjes, Annamaria Lamia Caputo ka komunikuar me Ergys Kastratin, i cili i ka dhënë udhëzime për vendtakimin. Në një mesazh zanor, ai i ka treguar zonën ku do të ndodhej personi i tij.
Pak minuta para mbërritjes në vendin e takimit, Caputo është afruar nga një person tjetër me automjet të ndryshëm, i cili i ka thënë: “Kur të arrijmë atje, le të bëjmë sikur nuk njihemi”, detaj që sipas hetuesve konfirmon organizimin dhe koordinimin e operacionit.
Në orën 16:11, Caputo mbërriti në stacionin e karburantit IP pranë Capurso, në drejtim të Barit, dhe informoi Ergys Kastratin me një tjetër mesazh zanor ku shkruante: “Kam mbërritur”. Lëvizjet e saj u dokumentuan përmes GPS-it të instaluar në automjet, por edhe nga kamerat e sigurisë së stacionit të karburantit.
Sipas hetimeve, në vendngjarje ndodhej edhe një automjet AUDI A4 Avant me targë FM702DF, i drejtuar nga një person që dyshohet të jetë Sergio Lamonaca. Mjeti rezulton i regjistruar në emër të Nevila Kamberit. Nga verifikimet në sistemin “Raport & Statistika” ka rezultuar se Nevila Kamberi kishte hyrë në territorin shqiptar së bashku me dy fëmijët e saj më 8 gusht 2025.
Read more:Katër migrantë gjenden të vdekur pranë kufirit Kroaci-Slloveni
Më pas, Ergys Kastrati i ka dërguar Caputo-s udhëzime të tjera zanore për të identifikuar kamionin që do të merrte paratë, duke përshkruar një kamion Volvo me tendë blu. Ai i referohej mjetit si i njëjti që ishte përdorur edhe në një takim të mëparshëm.
Pamjet filmike të siguruara nga hetuesit tregojnë se kamioni Volvo me tendë blu, kishte mbërritur në zonën e shërbimit që në orën 14:50 dhe ishte pozicionuar brenda pikës së karburantit ku do të realizohej dorëzimi i shumave monetare.
