Qytetarët zviceranë po i drejtohen sot kutive të votimit në një referendum të rëndësishëm që mund të sjellë ndryshime të mëdha në politikat e emigracionit dhe rritjes së popullsisë në vend.
Nisma është propozuar nga Partia Popullore Zvicerane (SVP), forca më e madhe politike në Zvicër, e cila kërkon vendosjen e një kufiri për popullsinë dhe frenimin e emigracionit. Sipas propozimit, popullsia e vendit nuk duhet të kalojë 10 milionë banorë deri në vitin 2050.
Zvicra numëron aktualisht rreth 9.1 milionë banorë. Në rast se referendumi miratohet, masat kufizuese për azilkërkuesit dhe ribashkimin familjar do të aktivizohen sapo popullsia të arrijë në 9.5 milionë banorë, një prag që pritet të kapet gjatë dekadës së ardhshme.
Read more:Lapaj kthen vëmendjen te referendumi, dorëzon në KQZ kërkesën për formularët: Shfuqizojmë dy ligje!
Propozimi parashikon gjithashtu që, nëse këto masa nuk mjaftojnë për të frenuar rritjen demografike, Zvicra mund të detyrohet të rishikojë ose edhe të përfundojë marrëveshjen e lëvizjes së lirë me Bashkimin Evropian.
Shumica e qytetarëve zviceranë kanë votuar me postë, ndërsa qendrat e votimit do të qëndrojnë të hapura vetëm për disa orë gjatë ditës. Rezultatet e para priten të publikohen pasditen e së dielës.
Read more:Refuzohet kthimi i Fatmir Limajt në PDK
Ndërsa sondazhet e para tregonin një mbështetje të fortë për nismën, matjet më të fundit kanë treguar një garë më të ngushtë, duke e bërë rezultatin përfundimtar të referendumit të vështirë për t’u parashikuar.
