Pak ditë pasi e njoftoi zyrtarisht nismën për të thirrur në votim të drejtpërdrejtë qytetarët, Adriatik Lapaj shkoi personalisht në KQZ për të dorëzuar një kërkesë për marrjen e formularëve. Synimi është të mbledhë 50 mijë firma për të kërkuar referendum për shfuqizimin e 2 ligjeve, atë të Paketës së Maleve dhe investimeve strategjike, dy ligje që sipas tij po grabisin masivisht pronat e shqiptarëve për t’ia dhënë njerëzve afër qeverisë.
“Po justifikohet vjedhja e pronës, do përballet me një proces referendar“, tha Lapaj.
Kjo lëvizje duket të jetë më shumë taktikë politike për të rikthyer në vëmendje çështjen e referendumit, pasi për realizimin e tij, edhe vetë Lapaj e pranon se është një rrugë e gjatë.
Read more (Adriatik Lapaj):Nafta si ‘burim uji’ në Kuçovë, por shqiptarët e paguajnë shtrenjtë, Lapaj: Turp i madh (VIDEO)
“I bie që nëse gjithçka do të shkojë mirë, i bie të bëhet vjeshtën tjetër“, u shpreh ai.
Referendumet janë një e drejtë kushtetuese, e përcaktuar në nenin 150 të Kushtetutës së Shqipërisë, që parashikon se 50 mijë qytetarë, ose 28 deputetë mund të thërrasin qytetarët në votim të drejtpërdrejtë, por rruga drejt tyre duket e gjatë për shkak të vakuumit ligjor.
Read more (Kqz):KQZ ua ka marrë dorën zgjedhjeve, Elezi: Janë sfidë, por i mbajmë
Kodi Zgjedhor aktual nuk ka asnjë parashikim për mënyrën se si zhvillohen referendumet. Në të, ka vetëm një dispozitë kalimtare që thotë se parashikimet në kodin e vjetër zgjedhor do të qëndrojnë në fuqi derisa të miratohet një ligj për zhvillimin e referendumit.
Sipas atyre parashikimeve, referendumet mund të zhvillohen vetëm në një ditë gjatë vitit dhe nuk mund të mbahen gjatë periudhave 6 muaj para zgjedhjeve dhe deri në 3 muaj pas tyre.
Read more (pronat):Çmimet e banesave u rritën me 28 %, Banka e Shqipërisë: U nxitën nga pronat në bregdet, ngadalësohet ritmi në Tiranë
Rrugëzgjidhja më e mirë do të ishte miratimi i një ligji të ri, i shumëkërkuar, po për të cilin ka munguar vullneti politik. Një draft për ligjin për referendumet, i prezantuar tashmë nga qeveria, parashikon shkurtimin e kohës së ndalimit të mbajtjes së referendumit, nga 6 në 3 muaj para zgjedhjeve dhe nga 3 muaj, në 1 pas zgjedhjeve.
Sipas draftit të qeverisë, një ligj mund të shfuqizohet nëse në referendum marrin pjesë 40% e zgjedhësve dhe votat e vlefshme duhet të jenë sa 30% e totalit të zgjedhësve të regjistruar. Ky draft, do të shkojë në parlament pasi të kalojë konsultimin publik.
