Deri më sot, domatja ka qenë pjesë e tryezës si sallatë, por në Përmet ajo po serviret edhe si ëmbëlsirë. Tabunë e ka thyer punishja “Bonjo”, një nga njësitë më të njohura të prodhimit të glikove tradicionale.
“Glikonë e domates e kemi filluar ne të parët, gliko ‘Bonjo.’ Në fillim e nisëm pak se kishim merak si do të dilte, por të tërë kanë mbetur të kënaqur”, thotë Marjanthi Çaculi.
Nisma i përket Liri Bonjos, administratores së punishtes, e cila vendosi të eksperimentojë duke e kthyer domaten në ëmbëlsirë.
Read more:Sot ju pëlqen qetësia më shumë se zakonisht… parashikimi i horoskopit për sot
Për përgatitjen e saj përdoren kryesisht domatet e vogla, të cilat janë më praktike për t’u përpunuar. Procesi i gatimit ngjan me atë të glikove tradicionale të arrës, kumbullës apo kajsisë, por sekreti që e shndërron domaten në gliko mbetet i pazbuluar. Liri Bonjo nuk pranon ta ndajë recetën me askënd. Madje, sipas punonjëseve të punishtes, ajo qëndron në vetmi gjatë përgatitjes së produktit.
Edhe mjeshtrja e njohur Marjanthi Çaculi, që punon në këtë punishte pranon se ende nuk e di formulën që eliminon aciditetin e domates.
Sipas saj, glikoja e domates është pritur shumë mirë nga konsumatorët dhe po kërkohet gjithnjë e më shumë.
“I kemi shumë të mira, me cilësi dhe nuk e zë glikoja glikonë. Pas arrës vijnë domatja e patëllxhani”, shton ajo.
Përveç glikosë me domate, punishja “Bonjo” ka sjellë më herët edhe produkte të tjera të pazakonta, si gliko me panxhar të athët dhe gliko me patëllxhan. Ndërsa teknologjia moderne po ndryshon mënyrën e prodhimit, punishtja “Bonjo” vijon të mbështetet te tradita dhe puna artizanale.
