DIVJAKË– Policia e Divjakës ka goditur një tjetër rast të organizimit të paligjshëm të lojërave të fatit, duke arrestuar pronarin e një lokali dhe kamarierin gjatë operacionit të koduar “Game Over”. Në pranga kanë rënë Altin Çoku 52 vjeç, pronar i lokalit në fshatin Karavasta e Re, dhe Edmir Çela 35 vjeç, kamarier në të njëjtin lokal.
Sipas Policisë, gjatë kontrolleve u zbulua se ambienti ishte përshtatur për zhvillimin e lojërave të fatit nëpërmjet kompjuterëve dhe telefonave celularë. Gjatë kontrollit të telefonit të kamarierit u konstatuan faqe të ngjashme me ato të basteve sportive.
Nga verifikimet rezultoi gjithashtu se 35-vjeçari ishte i punësuar në mënyrë të paligjshme.
Policia sekuestroi 5 njësi kompjuterike, një DVR, një laptop dhe 5 telefona celularë, të cilët dyshohet se përdoreshin për organizimin e aktivitetit të paligjshëm.
“Specialistët e Seksionit për Hetimin e Krimeve Ekonomike, në bashkëpunim me shërbimet e Komisariatit të Policisë Divjakë, në kuadër të operacionit policor të koduar “Game Over”, ushtruan kontrolle në lokale dhe ambiente të ndryshme që dyshoheshin se përdoreshin për organizimin e lojërave të fatit. Si rezultat i kontrolleve, u evidentua një rast i kësaj veprimtarie të paligjshme.
Në vijim të veprimeve procedurale, u arrestua në flagrancë shtetasi A. Ç., 52 vjeç, pasi në lokalin në pronësi të tij, në fshatin Karavasta e Re, Divjakë, dyshohet se organizoheshin lojëra fati nëpërmjet kompjuterëve dhe aparateve celularë.
Gjithashtu, u arrestua në flagrancë shtetasi E. Ç., 35 vjeç, kamarier në këtë lokal. Gjatë kontrollit të ushtruar në aparatin celular të tij u konstatuan faqe të ngjashme me ato të basteve sportive. Nga verifikimet e kryera rezultoi gjithashtu se shtetasi E. Ç. ishte i punësuar në mënyrë të paligjshme, pa qenë i regjistruar pranë organeve kompetente”, njofton policia.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Fier, për veprime të mëtejshme.
