Ministria e Shëndetësisë ka urdhëruar nisjen e një hetimi të thelluar administrativ për rastin e 52-vjeçarit Artan Andoni, banor i Durrësit, për mënyrën e trajtimit të tij nga strukturat shëndetësore dhe ato të shërbimit social.
Sipas të dhënave të Spitalit Rajonal të Durrësit, 52-vjeçari ishte fillimisht i shtruar në këtë spital, por për shkak të nevojës për një ndërhyrje të specializuar, disa javë më parë u transferua në Qendrën Spitalore Universitare “Nënë Tereza”, ku iu nënshtrua një operacioni për vendosjen e një proteze vaskulare.
Pas ndërhyrjes dhe në bazë të komunikimit mes mjekëve të QSUT-së dhe spitalit të Durrësit, pacienti u rikthye në Durrës për të vijuar trajtimin sipas udhëzimeve të përcaktuara në kartelën e tij mjekësore.
Me përfundimin e trajtimit, pacientit iu përgatit dokumentacioni për daljen nga spitali. Sipas spitalit të Durrësit, askush nuk u paraqit për ta marrë. Autoritetet spitalore njoftuan vëllanë e tij dhe shërbimin social, ndërsa më pas ai u transportua me autoambulancë në Portin e Peshkimit, ku, sipas spitalit, pritej të merrej nga familjarët, pasi kishte punuar më parë në atë zonë.
Megjithatë, askush nuk u paraqit për ta marrë dhe gjendja e tij shëndetësore u përkeqësua. Peshkatarët njoftuan shërbimin e urgjencës, ndërsa autoambulanca e riktheu pacientin në Spitalin Rajonal të Durrësit, ku ai u shtrua në urgjencë dhe iu nënshtrua një tjetër ndërhyrjeje kirurgjikale në këmbë.
.jpeg)
Mjekët bëjnë me dije se pacienti nuk është i sëmurë me AIDS, por është mbartës i virusit HIV. Aktualisht ai ndodhet në repartin e terapisë intensive, ku trajtohen pacientët pas ndërhyrjeve të tilla kirurgjikale.
Read more:Aksident në Fushë-Krujë, një i vdekur dhe një i plagosur
“Gjendja e pacientit është shumë e mirë pas interventit që ka bërë sot, nga ora 14:00 deri rreth orës 16:00. Pavarësisht llojit të operacionit, ka pasur një ecuri shumë të mirë pas operacionit. Pacienti është zgjuar dhe ndodhet në repartin e terapisë intensive”,- thotë mjeku.
Mjeku sqaroi se pacienti iu nënshtrua një ndërhyrjeje për rivendosjen e qarkullimit të gjakut në gjymtyrën e majtë, ndërsa vendimi për trajtimin u mor në bashkëpunim me QSUT-në.
“Pacienti është operuar fillimisht në QSUT. Më pas është dërguar për kontroll për të përcaktuar taktikën e mëtejshme. Sipas këshillës së tyre është operuar në spitalin tonë. Nuk është një ndërhyrje e lehtë dhe nuk kryhet në çdo spital, por operacioni u realizua me sukses nga një ekip me mbi 30 vite përvojë”,- thotë mjeku.
Read more:Makina përplas karrocën me një fëmijë 1 vjeç e gjysmë në Korçë, i mituri dërgohet në spital
Gjithashtu, mësohet se 52-vjeçari është përdorues kronik i lëndëve narkotike.
Ndërkohë, ministria e Shëndetësisë njoftoi se hetimi administrativ do të shqyrtojë jo vetëm procedurat e ndjekura nga strukturat spitalore, por edhe veprimet dhe përgjegjësitë e shërbimeve sociale të përfshira në këtë rast.
Sipas ministrisë, drejtuesit e Operatorit të Shërbimeve të Kujdesit Shëndetësor dhe të Shërbimit Social Shtetëror ndodhen në terren për të kryer verifikime të drejtpërdrejta dhe për të mbikëqyrur procesin e hetimit.
Po ashtu, është duke u verifikuar i gjithë dokumentacioni shëndetësor dhe administrativ, si edhe përgjegjësia e personave të përfshirë në menaxhimin dhe transportimin e pacientit.
Ministria thekson se pacienti vijon të marrë trajtim në Spitalin Rajonal të Durrësit dhe garanton se do të zbardhen të gjitha rrethanat e rastit, ndërsa do të merren masat administrative apo ligjore që do të rezultojnë të nevojshme.
