FINIQ– Një zjarr i përmasave të mëdha është përhapur me shpejtësi në disa zona, duke rrezikuar seriozisht edhe banesat e qytetarëve.
Zjarri ka rënë fillimisht zonën kodrinore të Matomares dhe për shkak të erës ka zbritur në zonën e banuar. Më problematike paraqitet situata në fshatin Kostar, ku flakët hynë në oborret e banesave, por fatmirësisht rreziku u neutralizua.
Problematike situata paraqitet edhe në fshatin Mesopotam, ku edhe aty flakët rrezikuan përkohësisht banesat. I rrezikuar është edhe fshati Vllahat, ku forcat zjarrfikëse janë stacionuar pranë shtëpive, për të shmangur përhapjen e mëtejshme të flakëve.
Veç automjeteve dhe forcave zjarrfikëse, edhe tre helikopterë Cougar po punojnë për shuarjen e flakëve, gjë që duket edhe në pamjet e siguruara nga Report Tv.
Për situatën e vështirë në fshatrat e Bashkisë së Finiqit ka reaguar edhe ministri i Brendshëm Besfort Lamallari, i cili ka thënë se strukturat shtetërore ndodhen në terren për mbrojtjen e jetës së qytetarëve dhe banesave. Lamallari gjithashtu ka ndarë edhe pamje nga evakuimi i banorëve të zonave të prekura nga zjarret.
Read more:Flakët përfshijnë Bregasin në Finiq, në terren zbresin zjarrfikës nga tre bashki
Lajmi në përditësim…
Vatër zjarri në Moglicë të Maliqit, zjarrfikësit nisen drejt zonës për të frenuar përhapjen e flakëve (VIDEO)
Një vatër zjarri ka rënë në fshatin Opar të njësisë administrative të Moglicës. Sipas të dhënave, zjarri ka përfshirë një sipërfaqe me shkurre dhe barishte. Mësohet se drejt vendngjarjes janë nisur forcat zjarrfikëse që do të bëjnë të mundur izolimin e vatrës. Nuk dihet ende sipërfaqja e prekur por siç duket edhe në pamje, zjarri ka nevojë për ndërhyrje urgjente për të mos u përhapur më tej.
Lajmi në përditësim
Zjarri në fshatrat e Finiqit, ministri Lamallari publikon pamje nga evakuimi i banorëve: Situatë e vështirë, prioritet absolut mbrojtja e jetës së qytetarëve (VIDEO)
Ministri i Brendshëm, Besfort Lamallari, ka reaguar për situatën e vështirë me të cilën po përballen disa fshatra të Finiqit, pas zjarrit të rëndë ditën e sotme.
Përmes një postimi në rrjetet sociale, Lamallari ka publikuar pamje nga evakuimi i banorëve të zonave të prekura nga flakët dhe ka theksuar se strukturat shtetërore janë në terren për sigurimin e jetës së qytetarëve.
Lamallari i ka bërë thirrje banorëve që të respektojnë udhëzimet e autoriteteve dhe të shmangin çdo veprim që mund të krijojë rrezik shtesë.
Reagimi i Lamallarit:
Prej orësh po përballemi me një situatë të vështirë nga zjarret në disa fshatra të Delvinës dhe Finiqit. Të gjitha strukturat tona janë në terren dhe operacioni vijon pa ndërprerje, si nga toka ashtu edhe nga ajri, me angazhimin e forcave të shumta zjarrfikëse, të Policisë së Shtetit, Forcave të Armatosura, shërbimeve vendore dhe 3 helikopterëve
Prioriteti ynë absolut është mbrojtja e jetës së qytetarëve, e banesave dhe e çdo pasurie të rrezikuar.
Ju bëjmë thirrje banorëve të respektojnë udhëzimet e autoriteteve dhe të shmangin çdo veprim që mund të krijojë rrezik shtesë.
Flakët kërcënojnë banesat, Report Tv sjell pamjet me dron nga zjarret në Finiq
Report Tv sjell pamjet me dron nga zjarret që kanë përfshirë fshatrat e Finiqit. Situata më kritike paraqitet në Kostar ku flakët janë pranë oborreve të banesave, siç duket edhe në pamje. Situatë e vështirë edhe në Mesopotam, ku po punohet për shuarjen e flakëve.
Mallakastër/ Zjarr në zonën e ‘Qafës së Vidhit’, digjen 10 hektarë me ullishte e shkurre! Flakët 100 metra pranë banesave dhe puseve të naftës (VIDEO)
Një zjarr i përmasave të mëdha ka rënë mesditën e sotme në afërsi të fshatit Hekal, pranë vendit të quajtur “Qafa e Vidhit” në Mallakastër.
Flakët, të favorizuara nga era e fortë, janë përhapur me shpejtësi në një sipërfaqe mbi 10 hektarë me ullishte dhe shkurre.
Zjarri u afrua rreth 100 metra pranë banesave dhe puseve të naftës në zonë, por fatmirësisht nuk i përfshiu ato.
Në vendngjarje kanë shkuar menjëherë 6 mjete zjarrfikëse të Ballshit, Patosit, Roskovecit dhe Albpetrolit, të cilat kanë bërë të mundur neutralizimin e flakëve.
Flakët rrezikojnë banesat në Kostar të Finiqit, dy helikopterë ndërhyjnë për shuarjen e zjarrit (VIDEO)
Dy helikopterë janë angazhuar për shuarjen e zjarrit në Kostar të Finiqit. Flakët, siç shihet edhe nga pamjet rrezikojnë banesat.
Ina Zhupa: Finiqi dhe Delvina në rrezik nga zjarri, qeveria të reagojë pa humbur asnjë minutë
Deputetja e Partisë Demokratike, Ina Zhupa, ka kërkuar reagim të menjëhershëm nga qeveria për vatrën e zjarrit të aktivizuar në zonën e Matomares, në Bashkinë Finiq, e cila po përhapet drejt Mesopotamit dhe fshatrave të Bashkisë Delvinë.
Ajo i bëri thirrje autoriteteve të shtojnë forcat në terren, të angazhojnë Emergjencat Civile dhe Forcat e Armatosura, si edhe të kërkojnë ndihmë ndërkombëtare për ndërhyrje ajrore nëse është e nevojshme, ndërsa paralajmëroi se çdo vonesë rrezikon të përsërisë fatkeqësine e zjarreve të vitit të kaluar në Delvinë.
Reagimi i Ina Zhupës:
Një vatër e rrezikshme zjarri është aktivizuar paraditen e sotme në zonën e Matomares, në territorin e Bashkisë Finiq. Flakët po avancojnë në drejtim të Mesopotamit dhe po përhapen edhe drejt fshatrave të Bashkisë Delvinë.
Forcat vendore kanë ndërhyrë që në orët e para, por zjarri nuk është vënë ende nën kontroll. Në këto kushte, qeverisja qendrore duhet të reagojë menjëherë me të gjitha kapacitetet e saj. Duhet të shtohen forcat zjarrfikëse, të angazhohen strukturat e Emergjencave Civile, Forcat e Armatosura dhe, nëse është e nevojshme, të kërkohet menjëherë ndihmë ndërkombëtare për ndërhyrje ajrore.
E dimë mirë se avionët e shuarjes se zjarrit të premtuar nga Edi Rama çdo vit dhe medemek të blera vjet nga Pirro Vengu nuk ekzistojnë. Prandaj, mos humbni kohë po ndërhyni me të gjitha mjetet që keni. Çdo minutë vonesë i jep përparësi flakëve.
Nuk duhet të lejojmë që të përsëritet fatkeqësia e vitit të kaluar në Delvinë, ku mijëra hektarë u dogjën me pasoja të rënda për banorët, ekonominë dhe mjedisin që i vuajnë ende.
Dardha e Librazhdit prej 6 ditësh në flakë, temperaturat e larta dhe era e fortë vështirësojnë shuarjen (VIDEO)
Prej gjashtë ditësh, zjarri që ka përfshirë masivin pyjor të fshatit Dardhë, në Bashkinë e Librazhdit, vijon të mbetet aktiv, ndërsa përpjekjet për shuarjen e flakëve po hasin vështirësi për shkak të terrenit të thyer malor, erës së fortë dhe temperaturave të larta.
Në operacion janë angazhuar forcat zjarrfikëse të Librazhdit, të mbështetura nga strukturat e Emergjencave Civile, të cilat po punojnë për izolimin e vatrave aktive dhe për të parandaluar përhapjen e mëtejshme të zjarrit.
Fatmirësisht, deri tani nuk raportohen persona të lënduar apo banesa të rrezikuara, pasi vatra ndodhet larg zonave të banuara. Megjithatë, zjarri ka përfshirë një sipërfaqe të konsiderueshme pyjore.
P.J/R.Xh/Shqiptarja.com
