Gjykata e Sarandës ka vendosur masat e sigurisë për pesë personat e arrestuar në fshatin Gjashtë, të cilët u kapën me armë zjarri dhe dyshoheshin se mund të ishin përgatitur për një ngjarje kriminale.
Para gjykatës dolën Alfred Kaja, 26 vjeç, dhe Sidorel Moriseni, 33 vjeç, të dyshuar për armëmbajtje pa leje, ndërsa Vitrin Hoxha, 21 vjeç, Franko Bobja, 22 vjeç, dhe Vionis Poka, 31 vjeç, akuzohen për moskallëzim krimi.
Gjykata vendosi masën e sigurisë “Arrest në burg” për Alfred Kajën dhe Sidorel Morisenin, ndërsa për tre personat e tjerë u caktua masa “Arrest në shtëpi”.
Sipas policisë, dy të parët u kapën me dy pistoleta, njëra prej të cilave me silenciator, teksa po i nxirrnin nga makina. Ata kishin zënë pritë në një zonë pa ndriçim.
Tre të rinjtë e tjerë që u kapën në automjetin tjetër, ndodheshin në shoqërinë e tyre në momentin e ndërhyrjes. Asnjëri prej tyre s’ka treguar detaje në polici se kush ishte personi që kishin vënë nën shënjestër.
Të pestë u kapën pranë lokalit të Rexhep Ismailit, i cili u ekzekutua me një plumb në kokë gjatë përplasjes me armë në lokalin e tij, ngjarje e ndodhur më 7 maj. Nga hetimet rezultoi se Ismaili ndërhyri në mbrojtje të mikut të tij, Viktor Rucit, person me precedentë penalë, por përfundoi ai viktima.
Lajm në përditësim…
——————————-
Sqarim: Çdo person prezumohet i pafajshëm deri sa nuk vërtetohet fajësia e tij me vendim gjyqësor të formës së prerë.
