TIRANË– Edhe Organizata Reporterët Pa Kufij i bashkohet reagimeve të ashpra ndaj rregullores së re të GJKKO-së që rikthen censurën ndaj mediave duke shuar edhe ato pak hapësira lirie informimi që kishin mbetur për gazetarët. Në një reagim ekskluziv për Report Tv, Reporterët Pa Kufij thonë se janë të shqetësuar pasi me rregulloren e re, gazetarët trajtohen si persona të dyshuar. Ata bëjnë thirrje për pezullimin e rregullores dhe nisjes së një konsultimi me shoqatat e gazetarëve dhe palët e tjera të interesuara.
“Jemi të shqetësuar që rregullorja e brendshme i trajton gazetarët apriori si të dyshuar, duke vendosur një ndalim të përgjithshëm dhe duke mos lejuar masa proporcionale të vlerësuara rast pas rasti. Ne mbështesim plotësisht kërkesën e shoqatave të gazetarëve në Shqipëri për të pezulluar zbatimin e kësaj rregulloreje dhe për ta amenduar atë mbi bazën e një konsultimi me shoqatat dhe palët e tjera të interesuara. Sa u përket standardeve evropiane, ndërsa disa vende lejojnë regjistrimin audio ose video të seancave gjyqësore, të tjera e ndalojnë rreptësisht atë për të mbrojtur integritetin dhe përqendrimin e procesit gjyqësor (siç është rasti i Francës, për shembull).”
Rregullorja e re ka hasur në kundërshtime të forta të komunitetit të gazetarëve, për shkak të kufizimeve dhe ndalime, që praktikisht e pamundësojnë mbulimin mediatik të proceseve gjyqësore në këtë Gjykatë.
Dokumenti i hartuar nga kryetari në detyrë Erion Bani, vendos kufizime dhe ndalime, që praktikisht e pamundësojnë mbulimin mediatik të proceseve gjyqësore në këtë Gjykatë. Publiciteti i seancave nga një rregull kthehet në përjashtim.
Prania e kamerave bëhet thuajse e pamundur, ndërsa gazetarëve, të cilët duhet të kërkojnë leje për ndjekjen e çdo seance, iu hiqet dhe përdorimi i telefonave celularë, si një mjet pune për transmetimin në kohë reale përmes mesazheve me tekst, të informacioneve nga seancat.
Federata Europiane e Gazetarëve në një reagim për Report Tv u shpreh se e konsideron Rregulloren, si regjimin më kufizues duke ngritur pyetjen nëse Gjykatat në Shqipëri kanë dicka për të fshehur. Ndërsa OSBE, po analizon nga afër situatën dhe do të vlerësojë edhe nëse akti i hartuar nga kryetari në detyrë i GJKKO-së Erion Bani, është ose jo në përputhje me legjislacionin vendas në fuqi dhe angazhimet përkatëse të OSBE-së e standardet ndërkombëtare.
