Pasi u duk se vendi më në fund ra disi në qetësi pas disa ditëve betejë me flakët, një vatër e re ka shpërthyer në Fushë-Krujë.
Flakët që kanë rënë në shpatin e malit, po rrezikojnë rreth 30 banesa në fshatin Abazaj dhe po ngjiten drejt majës. Për të vënë nën kontroll situatën që paraqitet mjaft serioze, ka nisur ndërhyrja nga ajri me helikopterë zjarrfikës.
Ndërkohë në Mallakastër janë shuar dy vatrat e zjarrit. Rreth mesditës së të shtunës, zjarrfikësit bënë të ditur se ka përfunduar operacioni në zonën Ndrenie–Vlosh–Panahor.
Kryetari i Bashkisë Mallakastër ka shprehur mirënjohje për të gjitha strukturat që u angazhuan në përballimin e situatës.
Ndërsa në Ndrenie dhe Vlosh nuk ka flakë, por ende digjen trungjet e pemëve në brendësi, ndaj situata po mbahet në monitorim nga shërbimet zjarrfikëse të Patosit.
Gjatë 24 orëve të fundit ishin raportuar 23 vatra zjarri në vend, por tashmë të gjitha janë shuar. Në Dajt dhe Priskë të Tiranës janë fikur plotësisht. Në Çikallesh dhe Leshtej-Collak, në Bashkinë Kavajë, ka përfunduar operacioni.
Të shuara janë dhe vatrat në Mushnik të Rrogozhinës, Plan të Bardhë në Klos, Kostren 2 në Berat dhe Uruçaj në Peqin.
Në operacionet e 24 orëve të fundit u angazhuan 47 makina zjarrfikëse dhe 445 forca operacionale. Po kështu, 65 efektivë të Forcave të Armatosura, 3 automjete të FA-së, 2 helikopterë dhe një avion “Air Tractor” i Forcës Ajrore.
Ende nuk ka një bilanc të dëmeve që shkaktuan zjarret në pemë frutore dhe masive pyjore.
Zjarr në kufirin mes dy fshatrave në Gjirokastër, izolohet vatra! Digjen 3 hektarë sipërfaqe me bimësi
Një zjarr i madh përfshiu kufirin mes fshatrave Golem e Progonat në Gjirokastër. Vatra, tashmë e izoluar dhe drejt shuarjes, ndodhet në majë të malit, në një terren tejet të vështirë.
Nga zjarri u përshkua një sipërfaqe prej rreth 3 hektarësh me bimësi shkurre e barishte.
Shërbimi zjarrfikës vijon të jetë në vendngjarje për monitorimin e territorit për ndonjë riaktivizim të mundshëm.
Zjarri në Fushë-Krujë, banorët përpiqen të ndihmojnë me mjete rrethanore: Rrezikohen 35 shtëpi, jemi mbi 500 vetë
Vatra e re e zjarrit që nisi rreth një orë më parë në Fushë-Krujë, është mjaft agresive. Banorët e zonës tregojnë për Report Tv se u janë bashkuar përpjekjeve të zjarrfikësve e helikopterëve për shuarjen e flakëve, por është mjaft e vështirë. Në këtë zonë janë rreth 30-35 banesa.
“Ka nja një orë që ka filluar zjarri. Janë ngritur banorët, kanë ardhur dy helikopterë. Banorët, me mjete rrethanore, janë përpjekur të fikin zjarrin. Shtëpitë këtu sipër janë komplet në rrezik, rrezikohen mbi 30-35 banesa, ullishte”, thotë një prej tyre.
Një tjetër banor tregon se po përdorin çdo mjet rrethanor që kanë në dorë për të luftuar me flakët që rrezikojnë shtëpitë ku jetojnë rreth 500 banorë.
“Jemi këtu me hunj, lopata e dhe duke u përpjekur ta shuajmë, por nuk shuhen. Jemi mbi 500 banorë vetëm këtu”, shton banori.
Situatë kritike në Fushë-Krujë, zjarri përfshin pyllin në shpatin e malit, rrezikohen 30 banesa! Kërkohet ndërhyrje nga ajri (VIDEO)
Një zjarr i madh ka rënë në Fushë-Krujë duke përfshirë pyllin në shpatin e malit. Flakët, të favorizuara nga era, rrezikojnë rreth 30 banesa në fshatin Abaze.
Situata është kritike pasi zjarri është fare pranë spitalit dhe po përhapet drejt majës së malit.
Kërkohet ndërhyrje nga ajri për të shuar flakët.
