Një emigrant shqiptar nga Italia, i pranishëm në protestën para Kryeministrisë, tha se pas 25 vitesh emigracion ka parë nga afër se drejtësia dhe respektimi i rregullave janë të mundshme dhe nuk janë të paarritshme.
“Vij nga Diaspora dhe jetoj prej 25 vitesh në Itali. Mësova diçka: drejtësia dhe rregulli nuk janë të paarritshme. Këta njerëz vijnë sot këtu sepse u ka mbaruar durimi”, u shpreh ai. Emigranti kritikoi atë që e cilësoi si “teatër” politik në media, duke akuzuar klasën politike se konfliktet publike mes saj janë të sajuara.
“Mashtrimi më i madh që i është bërë këtij populli është teatri i tyre në media, ku zihen dhe shahen, por është skenar. Sa herë bien reflektorët, zhduken konfliktet”, tha ai.
Sipas tij, pasojat e situatës në vend nuk janë vetëm ekonomike, por mbi të gjitha morale. “Humbja më e madhe nuk është ajo ekonomike, por morale. Na kanë vjedhur dinjitetin”, deklaroi emigranti. Ai e lidhi dinjitetin e qytetarëve me arsimin dhe shëndetësinë, duke kërkuar shërbime publike të barabarta për të gjithë, pavarësisht bindjeve politike.
Read more:Porti i Vlorës në kulmin e sezonit, rreth 2700 pasagjerë mbërrijnë sot me tre tragete nga Brindisi
“Dinjtet do të thotë një arsim i kualifikuar për të gjithë, pa dallime. Dinjitet do të thotë shëndetësi falas, pavarësisht bindjeve politike”, përfundoi ai.
