Aktivistja dhe anëtarja e Dhomës Britanike të Tregtisë, Silvana Xhaferi Hoxha, e ftuar në News 24, ka komentuar protestën që vijon prej 78 ditësh në Shqipëri, duke u ndalur te përfshirja gjithnjë e më e madhe e diasporës.
Sipas saj, ndryshe nga periudhat e mëparshme të protestës, sot në sheshe shihen qytetarë të moshave të ndryshme, nga të rinjtë deri te prindër me fëmijë, ndërsa një zhvillim i ri është angazhimi i shqiptarëve jashtë vendit. Hoxha tha se Londra mban numrin më të lartë të protestave, ndërsa në total janë përfshirë 67 qytete në mbarë botën.
“Jemi në ditën e 78 të protestës. Aktivistë të ndryshëm e kanë bërë aktivizmin në periudha të ndryshme dhe sot kemi nga të rinj deri te prindër me fëmijë. Ajo që nuk e kishim më parë është përfshirja e diasporës. Statistikat tregojnë se Londra mban numrin më të lartë të protestave dhe janë 67 qytete në mbarë botën që përfshihen”, u shpreh ajo.
Hoxha vuri theksin te numri i madh i ditëve të protestës së zhvilluara nga shqiptarët brenda dhe jashtë vendit, duke argumentuar se këto shifra duhet të shërbejnë si një sinjal për klasën politike.
“Ne kemi një shënim të datave dhe, kur shohim shifrat, pyesim veten se çfarë i ka bërë shqiptarët të lënë punët dhe të dalin në shesh. Këto janë të dhëna që duhen parë me shumë kujdes nga të gjithë politikanët, pasi po kundërshtohen të gjithë”, deklaroi ajo.
Sipas aktivistes, largimi i shqiptarëve nga vendi nuk mund të shihet thjesht si një zgjedhje ekonomike, pasi pas tij qëndrojnë edhe problemet sociale, mungesa e mundësive dhe perceptimi për mungesë drejtësie.
“Duhet analizuar edhe sa për qind e shqiptarëve janë jashtë vendit, sepse nuk është e lehtë të largohesh. Është shumë e dhimbshme. Arsyet pse çdokush largohet janë hallet dhe fakti që nuk gjejnë dot drejtësinë në vendin e tyre”, tha Hoxha.
Ajo theksoi se për shumë shqiptarë, emigrimi është kthyer në një model suksesi, ku puna dhe merita shihen si rrugë për të arritur rezultate.
“Në vendet ku shkon, sa më shumë të punosh, aq më shumë kjo do të reflektohet në arritjet e tua. Shumë shqiptarë kanë parë të afërmit e tyre dhe kanë nisur ta ëndërrojnë edhe vetë një jetë të tillë”, u shpreh ajo.
Hoxha tha se, sipas të dhënave që ajo referoi, rreth 49-50% e shqiptarëve ndodhen jashtë kufijve, duke e cilësuar këtë një realitet që politika shqiptare duhet ta kishte analizuar prej kohësh.
“Klasa politike duhet ta kishte parë dhe interpretuar këtë realitet, por nuk e ka bërë. Për aq kohë sa populli ka aftësinë të ngrihet, do të thotë që do të presim diçka të mirë”, deklaroi aktivistja.
Duke folur për rolin e të rinjve në protestë, Hoxha tha se energjia e tyre është një nga elementët më të rëndësishëm të kësaj lëvizjeje. Sipas saj, sfida e radhës është që pakënaqësia të shndërrohet në një platformë konkrete.
“Revolucionet i bën rinia, por e bukura është se ata dinë të artikulojnë dhe mënyra se si e shprehin mërzitjen për gjendjen e Shqipërisë është e veçantë. Mbetet për t’u parë se si do ta shndërrojnë këtë mërzitje në një platformë”, tha ajo.
Hoxha u ndal edhe te fakti që protesta nuk është shndërruar ende në një parti apo organizatë politike, duke argumentuar se një proces i tillë duhet të jetë gradual dhe se alternativat duhet t’i nënshtrohen gjykimit të qytetarëve përmes votës.
“Pyetja është pse nuk është shndërruar në parti ose organizatë, por kjo duhet të jetë graduale. Secili le të japë opsionin dhe populli të gjykojë me votë. Shqiptarët që janë jashtë kanë mundësi të ndihmojnë shumë, pasi fakti që kanë arritur me meritë mund t’u tregojë edhe të tjerëve se si mund të rregullohet Shqipëria”, u shpreh ajo.
Përsa i përket ditëve të dedikuara për diasporën, aktivistja tha se ato nuk i sheh domosdoshmërisht si një organizim të centralizuar, por si një mundësi që shqiptarët jashtë vendit të shprehin pakënaqësinë e tyre.
“Ditët e thirrjeve për diasporën mendoj se nuk janë një organizim i menduar, por u është dhënë atyre jashtë mundësia të shprehen, pasi nuk e kanë këtë hapësirë. Ajo që i përbashkon të gjithë janë kërkesat”, deklaroi Hoxha.
Në vijim, ajo kërkoi që përgjegjësia politike të lidhet me ligjet dhe vendimet që, sipas saj, kanë humbur legjitimitetin në sytë e qytetarëve.
“Për aq kohë sa nuk ka dhënë dorëheqjen, duhet të mbajë përgjegjësi për ligjet që tashmë janë delegjitimuar dhe të hapë krahun”, tha ajo.
Hoxha komentoi edhe qëndrimet e kryeministrit Edi Rama në raport me mediat e huaja, duke argumentuar se, sipas saj, deklaratat e tij kanë ndikuar në mënyrën se si perceptohet situata politike në Shqipëri.
“Rama demaskoi veten me gjuhën para mediave të huaja, çfarëdo sherri dhe dëmi të kishim bërë ne”, përfundoi Silvana Xhaferi Hoxha.
