Ana Dyrmishit, 25-vjeçarja që ka pësuar djegie në mbi 85% të sipërfaqes së trupit pas zjarrit në hotelin ‘Brooklyn’ në Vlorë, është transferuar në Turqi, për të marrë një trajtim mjekësor më të specializuar.
Pas përfundimit të të gjitha procedurave mjekësore dhe administrative nga QSUT dhe në bashkëpunim dhe koordinim me Ambasadën e Turqisë dhe autoritetet shëndetësore turke, pacientja do të vijojë trajtimin e specializuar në një spital në Turqi, njofton Ministria e Shëndetësisë.
Shpenzimet për trajtimin e pacientes në Turqi do të mbulohen nga shteti shqiptar.
6 persona, 5 nga Kosova dhe 1 nga Rrësheni, u lënduan nga zjarri që përfshiu mëngjesin e së dielës hotelin në Lungomare. Në përpjekje për të shpëtuar, pushuesit u detyruan të hidheshin edhe nga ballkonet për t’u shpëtuar flakëve.
Veç Dyrmishit, nën monitorim vijon të jetë edhe 30-vjeçari Aldo Kasimi, i cili ka pësuar djegie në rreth 30% të trupit. Të plagosurit e tjerë, dy prej të cilëve, Nderim dhe Arlinda Rexhepi, përfunduan te ‘Trauma’ nga frakturat, janë në gjendje të stabilizuar.
Zjarri nisi në katin e parë të hotelit për shkak të defektit në prizën elektrike të frigoriferit.
Brenda godinës së “Brooklyn Hotel” në pronësi të Manushaqe Abazit, kishte dhe pushues të tjerë të huaj të cilët fatmirësisht shpëtuan pa lëndime.
Read more:Lirohet nga detyra drejtoreshën e QSUT, ja kush do ta zëvendësojë Anxhela Paparizon
Pas zjarrit, autoritetet janë vënë në lëvizje për kontrolle më të forta në hotele dhe verifikim i masave kundër zjarrit në të gjitha strukturat akomoduese.
25-vjeçarja që i mbijetoi zjarrit në Vlorë niset për kurim në Turqi, Koçiu garanton mbështetjen e qeverisë: Ana nuk është vetëm, do të marrë trajtimin më të mirë!
Ndërsa Ana Dyrmishi po transferohej drejt Turqisë për të vijuar trajtimin e specializuar pas djegieve të rënda që pësoi nga zjarri në hotelin “Brooklyn” në Vlorë, zv.kryeministrja Albana Koçiu përcolli një mesazh mbështetjeje për 25-vjeçaren, duke garantuar se qeveria shqiptare do të mbulojë të gjitha shpenzimet e kurimit të saj.
Përmes një postimi në Facebook, Koçiu tha se institucionet janë angazhuar që në momentet e para për t’i garantuar Anës ndihmën e nevojshme mjekësore dhe, pas trajtimit në QSUT, u bë i mundur transferimi i saj në një spital të specializuar në Turqi në bashkëpunim me autoritetet turke.
“Pas zjarrit në hotelin në Lungomare, Ana vetëm 25 vjecc po përballet me një nga betejat më të vështira të jetës/. Ajo ka pësuar djegie në 85 % të trupit dhe ndodhet në gjendje të rëndë shëndetësore. Që në momentet e para, rastin e Anës e kemi ndjekur me vëmendje të plotë dhe jemi angazhuar për t’i garantuar çdo ndihmë dhe kujdes mjekësor. Pas marrjes së ndihmës së parë në QSUT, mjekët na kanë rekomanduar vijimin e trajtimit në një qendër të specializuar jashtë vendit. Përballë kësaj situate, kemi ndërhyrë menjëherë për të bërë të mundur transferimin e saj drejt Turqisë, në bashkëpunim me autoritetet turke. Atje do të vijojë trajtimin dhe kujdesin e specializuar që kërkon gjendja e saj. Në këto momente, Ana po transportohet drejt Rinasit për tu nisur drejt Turqisë. Qeveria shqiptare do të vijojë të jetë pranë Anës dhe familjes së saj duke bërë gjithçka që është e mundur që ajo të marrë kujdesin më të mirë, trajtimin më të specializuar dhe çdo mundësi për ta fituar këtë betejë. Ana nuk është vetëm në këtë moment të vështirë. I uroj forcë, kurajo dhe shërim sa më të shpejtë” tha Koçiu
Zv.kryeministrja theksoi se qeveria do të jetë pranë 25-vjeçares dhe familjes së saj gjatë gjithë kësaj beteje.
“Të gjitha shpenzimet për trajtimin në Turqi do të mbulohen nga Qeveria Shqiptare. Në këtë betejë, Ana nuk është vetëm. Do të vijojmë të jemi pranë Anës dhe familjes së saj, duke bërë gjithçka të mundur që ajo të marrë kujdesin dhe trajtimin më të mirë. Forca Ana. Urojmë shërim të shpejtë edhe për dy pacientët e tjerë që ndodhen në QSUT dhe po marrin kujdesin e nevojshëm mjekësor”, shkroi Koçiu në rrjete sociale
