Me vendimin e marrë në mbledhjen e kësaj të mërkure anëtarët e Këshillit të Lartë Gjyqësor kanë rritur pagën referuese të çdo gjyqtari në vend me 65.600 lekë. Duke filluar nga 1 gushti 2026 sipas aktit të KLGJ të marrë më 9 vota pro e 0 kundër çdo pagë e gjyqtarëve do të llogaritet mbi pagën referuese 222. 425 lekë nga 156.800 lekë që ishte më herët, plus shtesa e nivelit të kualifikimit 14.000 lekë.
Kliklo këtu për të lexuar vendimin e Këshillit të Lartë Gjyqësor
Ky vendim i KLGJ përbën një rast të pa ndodhur më parë për shkak se pagat e magjistratëve në vend kanë qenë gjithnjë të përcaktuara në ligjin për statusin e gjyqtarëve dhe prokurorëve.
Por çfarë ndodhi dhe pse Këshilli i Lartë Gjyqësor ndërhyri në këtë situatë. Një vendim i Gjykatës Kushtetuese i shkurtit 2026 rrëzoi ndryshimet ligjore të vitit 2023 që përcaktonin pagën e magjistratit sa 0.36 e pagës së Presidentit të Republikës, me argumentin se kishte ulje të fshehtë dhe kjo ishte antikushtetuese.
Bashkë me rrëzimin e nenit përkatës, Kushtetuesja i la detyrim Kuvendit ta rregullonte tashmë hapësirën ligjore deri më 31 korrik 2026. Por mazhoranca, një ditë para skadalimit të afatit, vetëm sa e depozitoi në parlament një propozim për formulë të re që e rriste pagën nga 0.36% të pagës së Presidentit në 0.38% të po së njëjtës pagë.
Kjo sipas Këshillit të Lartë Gjyqësor krijoi një situatë absurde pasi mungonte ligji se si do të paguhen gjyqtarët për muajin gusht e në vijim dhe situatën e mori vetë në dorë qeverisja e gjyqësorit.
“Sipas optikës time jemi në rregull me zbatimin e ligjit sepse nga analiza e mësipërme, formula është origjinë ligjore, Gjykata Kushtetuese nuk ka krijuar formulë të re vetëm ka interpretuar përmbajtjen e formulës ekzistuese… Vendimet e GJK, janë detyruese për të gjitha autoritetet publike përfshirë edhe KLGJ. Gjykata Kushtetuese ka vendosur, dhe nuk ka vepruar kuvendi. Mosveprimi i Kuvendit përbën një mekanizëm antikushtetuetshmërie”, tha gjatë mbledhjes Albens Tabaku, anëtar i KLGJ.
Ndërhyrja e KLGJ-së vjen pas paralajmërimeve të shoqatave të magjistratëve se mosveprimi i Kuvendit nuk mund të pengonte zbatimin e vendimit të Gjykatës Kushtetuese.
Tre shoqatat e gjyqtarëve dhe prokurorëve argumentuan në fillim të gushtit se, pas skadimit të afatit të vendosur nga Kushtetuesja, pagat duhet të përllogariten duke iu referuar formulës së lidhur me pagën e funksionarit të administratës së lartë publike.
Sipas tyre, nga 1 gushti 2026 përllogaritja e pagave duhet të bëhet mbi këtë bazë, ndërsa e njëjta formulë duhet të përdoret edhe për detyrimet e prapambetura për periudhën 1 prill 2023–31 korrik 2026 gjë e cila u pranua edhe nga KLGJ.
Në propozimin e dorëzuar në Kuvend dy deputetët e PS-së, Aulona Bylykbashi dhe Admir Kadeli, që ruante si pikë referimi pagën e Presidentit të Republikës, me rritjen e koeficientit nga 0.36 në 0.38, thuhet në relacion se ky propozim krijonte një ekuilibër mes garancive financiare për pavarësinë e magjistratëve dhe qëndrueshmërisë së sistemit të pagave publike.
Rritja me 65.600 lekë e pagës referuese duke i shtuar edhe 14 mijë lekëshin e grupit të diplomës realisht do t’i rrisë ndjeshëm pagat e magjistratëve, që shkojnë deri në mbi 3000 euro më shumë për institucionet e larta të sistemit apo edhe strukturat e posaçme, për shkak të formulave të përcaktuara në ligj. Sa i përket prokurorëve një vendim i ngjashëm duhet të koordinohet dhe merret nga Këshilli i Lartë i Prokurorisë, apo sipas rastit nga Prokuroria e Përgjithshme dhe SPAK.
Përplasja gjyqësor-qeveri për pagat
Çështja e pagave të magjistratëve, është shoqëruar me një përplasje të gjatë gjyqësore mes tyre dhe qeverisë. Në vitin 2023, pas një vendimi të Gjykatës Kushtetuese, mazhoranca, përcaktoi se rroga bazë e magjistratëve do të ishte sa 36% e pagës së Presidentit, pra 153.000 lekë.
Read more:Ikën Sokol Sadushi/ Hapet gara për të zgjedhur kryetarin e ri të Gjykatës së Lartë!
Më herët referenca mbi të cilën llogaritej rroga ishte 132,100 lekë, aq sa ishte paga e drejtorit të departamentit në Kryeministri. Me ndryshimin e ligjit nga qeveria rritja ishte me mbi 20 mijë lekë të reja.
Por kjo rritje u konsiderua si ulje nga ana e gjyqtarëve. Kjo për shkak se në të njëjtën kohë, qeveria rriti pagat për administratën publike. Dhe paga e drejtorit të departamentit në Kryeministri shkoi në 231 mijë lekë të reja.
Sipas gjyqtarëve, ndryshimi i referencës së pagës së tyre nga ajo e drejtorit të departamentit në Kryeministri te ajo sa 36% e pagës së Presidentit, ua uli pagën, pasi nëse s’do bëhej ky ndryshim ajo do të ishte 78 mijë më e lartë.
Gjykata bëri të ditur se në vlerësimin e kërkesës së Unionit të gjyqtarëve ajo kishte mbajtur parasysh përcaktimin e nenit 138 të Kushtetutës sipas të cilit “Paga dhe përfitimet e tjera të gjyqtarit nuk mund të ulen”.
Dhe sipas saj “ndonëse rezultati në vlerë financiare absolute i pagës së gjyqtarit, i prodhuar nga formula e re e aplikuar nga qeveria në 2023, nuk është më i ulët se sa ai i prodhuar nga formula e mëparshme, në raport me rritjen ekonomike si dhe rritjen e çmimeve, ka passjellë një ulje të fshehur të shënjestruar të pagës së magjistratit, duke e ngrirë atë”.
Projektligji i dy deputetëve socialist, parashikon ndërkohë një rritje të pagës së anëtarëve të Gjykatës së Lartë, përmes rishikimit të shtesave të parashikuara për vjetërsi apo vështirësi në punë, e cila përkthehet automatikisht shoqërohet me të njejtat efekte dhe mbi pagata e anëtarëve të Gjykatës Kushtetuese.
Një shtesë në pagë në masën 5 përqind, për funksionin, është propozuar dhe për Prokurorin e Përgjithshëm.
Por pavarësisht propozimit të dy deputetëve, ajo që do të thotë fjalën e fundit duket se do të jetë qeveria, duke qenë se bëhet fjalë për një ndërhyrje me efekte financiare.
Vendimi i KLGJ për rritjen e pagave të gjyqtarëve, reagon Qeveria për Report TV: Po e analizojmë!
KLGJ ndërhyri këtë të mërkurë për të zgjidhur ngërçin e pagave të gjyqtarëve, pasi Kuvendi nuk miratoi një ligj brenda 31 korrikut për të zbatuar një vendim të Gjykatës Kushtetuese. Nga 1 gushti, paga referuese do të jetë 222 mijë e 425 lekë, nga 156.800 lekë që ishte më herët, plus shtesa e nivelit të kualifikimit 14.000 lekë. Po ashtu, u miratua edhe propozimi për kompesimin e rritjes së munguar nga data 1 prill 2023 deri më 31 korrik të këtij viti.
Mbi këtë vendim, gazetari i Report TV Isa Myzyraj kërkojë një reagim nga Qeveria. Në përgjigje të kësaj kërkese, Qeveria dha këtë reagim ekskluzivisht për Report TV:
“Kjo është një çështje delikate që kërkon fillimisht një analizë të brendshme dhe sapo të merret një vendim lidhur me këtë do t’ju mbajmë të informuar.” – thuhet në reagimin e Qeverisë.
Çështja e pagave të magjistratëve, është shoqëruar me një përplasje të gjatë gjyqësore në Gjykatën Kushtetuese mes gjyqtarëve/prokurorëve dhe qeverisë, që nga viti 2023.
