Në vigjilje të nisjes së vitit të ri shkollor, në institucionet arsimore 9-vjeçare ka nisur shpërndarja e librave. Për herë të parë, të gjithë nxënësit e arsimit fillor, nga klasa e 1-rë deri në të 5-tën, do të pajisen me tekste të reja dhe falas. Bëhet fjalë për rreth 9 mijë nxënës, ndërsa kostoja arrin në rreth 43 milionë lekë .
“Mes nxënësve dhe prindërve të tyre, teksa ka nisur shpërndarja e teksteve shkollore për vitin e ri, këtë herë me një lajm të veçantë, ku për herë të parë, i gjithë cikli i arsimit fillor, nga klasa e parë deri në klasën e pestë, do të ketë tekste shkollore falas dhe të reja. Një fillim viti me librat e rinj në duart e fëmijëve, me më shumë lehtësi për familjet dhe me kujdesin që çdo nxënës të nisë mësimin me mjetet e duhura për të mësuar e për të ecur përpara”, tha Mirela Kumbaro.
Read more:Udhëzimi i ri i arsimit, ndryshojnë rregullat për klasat e bashkuara, deri me 30 nxënës në një grup
Ndërkohë, nxënësit e klasave të 6-ta deri në të 9-tën do të vijojnë me skemën e dorëzimit dhe ripërdorimit të teksteve, duke ia kaluar librat brezit pasardhës në përfundim të vitit shkollor.
Gjatë vizitës në shkollën “Andrea Stefani”, ministrja e Arsimit, Mirela Kumbaro, zhvilloi edhe një takim me stafin pedagogjik.
Gjatë takimit u diskutuan prioritetet për këtë vit, siç janë ndalimi i përdorimit të celularëve në shkolla, zbatimi i Kodit të Etikës për mësuesit, si dhe vijimi i programit “Pas Shkolle”, i cili këtë vit shtrihet në 408 shkolla në të gjithë vendin.
