Revolta qytetare kundër kabinetit qeveritar hyn këtë të enjte në ditën e saj të 96-të, ku kërkesa kryesore dhe e panegociueshme e protestuesve mbetet dorëheqja e menjëhershme e kryeministrit Edi Rama. Mirëpo, përveç aksionit në bulevard, qëndresa po përballet edhe me një betejë të re në hapësirën virtuale.
Prej orësh tashmë llogaritë e qindra zërave kritikë dhe protestues kundër qeverisë mbeten të mbyllura.
Një sulm i koordinuar digjital ka goditur së fundmi profilet në rrjetin shoqëror Instagram të disa prej figurave kryesore të protestës dhe zërave kritikë ndaj pushtetit. Deri më tani raportohet për mbylljen e dhjetëra llogarive, mes të cilave figuron faqja zyrtare e kreut të Partisë “Mundësia”, Agron Shehaj, si dhe ajo e ekspertit të IT-së dhe aktivistit Gent Progni.
Lajmi për bllokimin e llogarisë është bërë me dije fillimisht nga vetë Shehaj, ndërsa deputetja e pavarur, Marjana Koçeku, ka denoncuar se në fakt bëhet fjalë për një valë masive goditjeje ku janë mbyllur mbi 200 faqe me përmbajtje nga protesta.
Përmes një reagimi publik, Koçeku e ka cilësuar këtë situatë si një goditje të drejtpërdrejtë ndaj lirisë së shprehjes, ndërsa ka njoftuar se e ka raportuar tashmë këtë ndërhyrje pranë institucioneve të Bashkimit Evropian.
“Një valë sulmesh online ka nisur veçanërisht që nga dita e djeshme kundër disa figurave opozitare me ndikim politik dhe publik. Mbi 200 faqe Instagrami me përmbajtje nga protestat janë mbyllur, përfshi këtu faqen zyrtare të deputetit Agron Shehaj, aktivistit Gent Progni dhe faqeve të njohura që e kanë mbështetur vazhdimisht protestën. Këto ditë në Forumin e Bled-it, siguria online dhe sulmet kibernetike ndaj lirisë së shprehjes ishin kryefjala e diskutimit të Komisionerëve Evropianë. Qeveria jonë në forume ndërkombëtare e mbron këtë të drejtë me fanatizëm, por tenton me çdo kusht e çdo mjet ta shembë në shtëpinë e vet”, ka deklaruar Koçeku.
