Të rinjtë shqiptarë që shërbejnë në strukturat zjarrfikëse të vendeve të Bashkimit Europian do të kontribuojnë në rishikimin tërësor të kuadrit ligjor të shërbimit zjarrfikës në Shqipëri, përfshirë edhe rishikimin e kriterit të moshës për pranimin në këtë shërbim.
Ministri i Punëve të Brendshme, Besfort Lamallari, zhvilloi një takim me disa profesionistë shqiptarë që prej vitesh ushtrojnë detyrën e zjarrfikësit në Finlandë dhe Gjermani, si dhe me të rinj të apasionuar pas këtij profesioni, me fokus përmirësimin e mëtejshëm të shërbimit zjarrfikës në vend.
“Kemi nisur punën për përmirësimin e bazës ligjore për një sistem sa më efektiv, parandalues dhe mbrojtës kundër zjarrit në vend, përfshi dhe rishikimin e kriterit moshor për pranimin në shërbim”, u shpreh Lamallari.
Në takim u diskutua për nevojën e një rishikimi tërësor të kuadrit ligjor dhe forcimin e kapaciteteve të shërbimit zjarrfikës, duke përfituar nga përvoja e profesionistëve shqiptarë që punojnë në shërbimet homologe të vendeve të BE-së.
Ministri vlerësoi kontributin dhe përvojën e Albanit, Bojkenit dhe Angjeles, të cilët shërbejnë në Finlandë, si dhe të Greinit e Luçianos në Gjermani, ndërsa theksoi rëndësinë e përfshirjes së të rinjve që duan t’i bashkohen këtij shërbimi. Në vijim, bashkëpunimi do të shtrihet edhe në rritjen e kapaciteteve profesionale përmes trajnimeve, shkëmbimit të eksperiencave dhe kontakteve me shërbimet homologe të vendeve ku profesionistët shqiptarë ushtrojnë aktivitetin e tyre.
Përvoja e diasporës shqiptare dhe njohuritë e profesionistëve që shërbejnë në vendet e BE-së do të shërbejnë si një vlerë e shtuar në procesin e modernizimit të shërbimit zjarrfikës shqiptar.
