Deputeti i Partisë Demokratike, Klevis Balliu, ka hedhur akuza të forta lidhur me kompaninë shtetërore KAYO, duke e cilësuar aferën edhe më të madhe se ajo e inceneratorëve.
I ftuar në emisionin “Minuta e Parë” në News24, Balliu deklaroi se aktiviteti i kompanisë ngre pikëpyetje të mëdha për mënyrën e funksionimit dhe përdorimit të fondeve publike. Sipas tij, KAYO ka një numër shumë të kufizuar punonjësish, çka, në vlerësimin e tij, ngre dyshime mbi kapacitetet reale të prodhimit të armëve.
Balliu akuzoi gjithashtu ministren e Infrastrukturës dhe Energjisë, Belinda Balluku, për rol në vendimmarrjet që lidhen me bashkëpunimin mes shtetit dhe KAYO-s. Ai ngriti pikëpyetje edhe mbi përfshirjen e biznesmenit Ron Yeffet në marrëdhëniet me kompaninë dhe në projekte të tjera të lidhura me persona të afërt me mazhorancën.
Deputeti i PD-së theksoi se pas vendimeve dhe kontratave të lidhura me KAYO-n janë përfshirë miliona euro nga buxheti i shtetit. Balliu e cilësoi çështjen KAYO si një prej aferave më të mëdha që, sipas tij, kërkon hetim të plotë nga institucionet kompetente.
“KAYO ka vetëm 14 punonjës dhe me kaq punonjës nuk prodhohen dot armë. Ahmetaj e tha mirë se këtu bëhet trafik armësh. Belinda Balluku ka firmosur vendimin e Këshillit ë Ministave në mungesë të Edi Ramaës, që shteti të bashkëpunojë me KAYO-n. Ron Yefet blen aksionet për 400 euro, duket që ka mashtrim. Arjeta Puco u mor në Podcastin e Ramës.
Rama shkon në Kashar, ku ishte kompania e Ajeta Pucës, për të parë sesa armë kishte prodhuar ajo. Tre muaj më pas Puca dhe Ron Yefet marrin 10 mln euro nga buxheti. Vjedhja e shekullit është KAYO, edhe më e madhe se inceneratorët. Ron Yettet është i përfshirë në një resort të sekuestruar të Ergys Agasit. Ai pranon se Rama na ka kontraktuar që ne të bëjmë punë të pista. Edhe arriera e Nufit bazohet tek marrëveshja mes Ramës e Ballukut dhe të Ron Yefet. Ministria e Mbrojtjes sot është KAYO”,tha Balliu.
