Prej fillimit të këtij muaji, avokatët kanë vendosur unanimisht bojkot të seancave në Gjykatën e Posaçme, në shenjë kundërshtie të hapur ndaj rregullores që në thelb cenon detyrën e gazetarëve dhe të avokatëve duke mos lejuar telefonat celularë në sallë. Por, ndonëse bojkoti ka çuar në dështimin e zhvillimit të dhjetëra gjyqeve, GJKKO e ka treguar qartë se nuk e ka në plan të tërhiqet nga rregullorja e re hartuar nga kryetari Erion Bani, e cila po ashtu është kundërshtuar ashpër edhe nga komuniteti i medias.
Kur rregullorja e re u fut në fuqi më 1 shtator, kryetari i Dhomës së Avokatisë depozitoi një kërkesë në GJKKO përmes së cilës kërkoi rishikimin e rregullores. Por, Gjykata e Posaçme e ka shpërfillur për rishikim dhe në një përgjigje që u ka kthyer avokatëve, u kërkon që ta zbatojnë rregulloren ose në të kundërt ta kundërshtojnë ligjërisht. Por, ndonëse i pengon të kryejnë detyrën, GJKKO u thotë avokatëve që kontestimi i rregullores nuk duhet të shërbejë për bojkotin e gjyqeve.
“GJKKO-ja sqaron se Rregullorja ka hyrë në fuqi më datë 01.09.2026 dhe se, si akt i miratuar sipas procedurës së parashikuar dhe në fuqi, ajo është e detyrueshme për të gjithë pjesëmarrësit në procesin gjyqësor. Për rrjedhojë, GJKKO- ja kërkon nga Dhoma e Avokatisë së Shqipërisë zbatimin e plotë të saj, përfshirë nenin 76. Në rast se Dhoma e Avokatisë vijon ta kontestojë këtë rregullim, ajo ka në dispozicion rrugët ligjore përkatëse për ta kundërshtuar atë përpara organeve kompetente; ndërkohë, kontestimi nuk e pezullon efektin juridik të Rregullores dhe nuk mund të shërbejë si shkak për mospjesëmarrje në seancat gjyqësore”, thuhet në përgjigjen që GJKKO i ka dërguar Dhomës së Avokatisë.
Ndonëse avokatëve nuk iu lejohet celulari, të cilët e konsiderojnë një kufizim në mbrojtjen e klientëve, GJKKO thotë se ky ndalim është për të gjithë, përfshirë gazetarët, prokurorët e gjyqtarët.
“Kompjuteri portativ është plotësisht në dispozicion të mbrojtjes. Mbrojtësi hyn në sallë me laptopin e tij dhe e përdor atë gjatë gjithë seancës, në modalitet pa zë, për dosjen elektronike, aktet, provat, jurisprudencën, kërkesat dhe shënimet. Për qëllime procedurale, kjo pajisje mbulon nevojat kryesore dokumentare dhe të konsultimit gjatë gjykimit
Komunikimi urgjent gjatë seancës është tërësisht i mundësuar. Kur lind nevoja procedurale, mbrojtësi i drejtohet kryesuesit të trupit gjykues, i cili autorizon daljen nga salla sipas nenit 73, pika 8, ose shfrytëzohet pushimi i seancës”, thuhet në letër.
Por Kryetari i Dhomës së Avokatëve të Shqipërisë, Maksim Haxhia, në një reagim për Report TV e ka konsideruar të turpshëm qëndrimin e Gjykatës. Ai paralajmëroi përshkallëzim të protestes , duke përfshirë edhe bojkotin e masave të sigurisë, nëse nuk ka tërheqje nga rregullorja.
“Ditën e henë kemi mbledhjen e Komitetit që do marrë në analizë të gjithë situatën dhe do vendosë mbledhjen e Këshillit të Përgjithshëm. Aty do vendoset nëse do hiqet, do vazhdohet apo radikalizohet. Prevalon propozimi që të abandonohet edhe masat e sigurisë”, thotë Haxhia.
Read more:Meta kundërshton pezullimin e paraburgimit, Apeli i GJKKO shtyn vendimin
Edhe gazetarët në shenjë kundërshtie ndaj kësaj rregulloreje, që përveç kamerave, i ndaloi edhe futjen në seancë me celular, i vetmi mjet pune për të përcjellë informacionin në kohë reale për qytetarët, nuk janë akredituar në GJKKO.
Në vend të tërheqjes nga rregullorja, Gjykata e Posaçme Kundër Korrupsionit dhe Krimit të Organizuar mbylli grupin e komunikimit në WhatsApp ku ishin të përfshirë gazetarët që mbulojnë aktivitetin e saj, përfshirë punonjës të redaksive mediatike që për të bërë detyrën duhet të vihen në dijeni mbi njoftimet publike nga kjo gjykatë.
Edhe rregullat e akreditimit të gazetarit, cenojnë redaksitë e mediave, pasi kërkonin të dhëna personale, deri në adresën e banimit të një gazetari të përveçëm, duke mos i dhënë mundësi redaksive të mediave të dërgojnë një tjetër gazetar në procese. Kjo mund të realizohet vetëm si publik, por edhe në këtë rast gazetari mund të hyjë në sallë vetëm nëse ka vende të lira.
Rregullorja është kundërshtuar ashpër edhe mediat dhe organizatat ndërkombëtare të gazetarëve pasi censuron punën e tyre dhe cenon të drejtën e informimit.
Lajmi në përditësim….
Kliko këtu per të lexuar dokumentin e plotë
GJKKO nuk tërhiqet nga rregullorja censuruese, Haxhia: Qëndrim i turpshëm, përshkallëzojmë bojkotin
Gjykata e Posaçme Kundër Korrupsionit dhe Krimit të Organizuar nuk tërhiqet nga vendimi për të ndaluar mbajtjen e telefonave celularë gjatë seancave. Ajo thotë se nuk pengohet puna e avokatëve të cilët sipas saj duhet të ndërpresin bojkotin dhe të kërkojnë rrugë ligjore për të kundërshtuar Rregulloren. Por Kryetari i Dhomës së Avokatëve të Shqipërisë, Maksim Haxhia, në një reagim për Report TV e ka konsideruar të turpshëm qëndrimin e Gjykatës Ai paralajmëroi përshkallëzim të protestes , duke përfshirë edhe bojkotin e masave të sigurisë, nëse nuk ka tërheqje nga rregullorja.
“Dua të sqaroj që ne nuk na ka ardhur përgjigja zyrtare. Ajo që ju i referoheni ka të bëjë me një publikim në portale, në Instagram apo Facebook, ose në faqen e Gjykatës së Posaçme të Shkallës së Parë kundër Korrupsionit dhe Krimit të Organizuar, por Dhomës, në mënyrë zyrtare nuk i është përcjellë asnjë shkresë me atë korrrektësie me të cilën i jemi drejtuar kryetarit me datë 1 ku kërkojmë rishikimin e rregullores me bonsensin dhe bashkëpunimin ndër institucional për të mirën e procesit. Ditën e henë kemi mbledhjen e Komitetit që do marrë në analizë të gjithë situatën dhe do vendosë mbledhjen e Këshillit të Përgjithshëm. Aty do vendoset nëse do hiqet, do vazhdohet apo radikalizohet. Prevalon propozimi që të abandonohet edhe masat e sigurisë. Unë s’jam personalisht për një gjë të tillë se nuk duam të bëhemi shkaktarë që të futet sistemi në amulli, negjithëse nuk jemi ne, por ne jemi të hapur e të komunikuar. Po i bëj thirrje publike Këshillit të Lartë Gjyqësor të ulet me ne për të gjitha problemet” tha ai.
Shtyhet seanca për dosjen ‘Meta’/ Erion Bani paralajmëron avokatët: Nëse nuk vini në gjyq, do gjobiteni
Është shtyrë për në datën 24 shtator, seanca gjyqësore për ish-Presidentin Ilir Meta dhe ish-bashkëshorten e tij Monika Kryemadhi. Megjithëse Meta dhe Kryemadhi kërkuan ta zhvillonin procesin pa praninë e avokatëve, mungesa e një anëtari të trupit gjykues, Rudina Palloj, bëri që seanca të shtyhej.
Edhe pse ishin të pranishëm në sallë, avokatët e Metës dhe Kryemadhit u ulën në pjesën e publikut dhe i bënë me dije gjykatës se ishin në bojkot, në zbatim të vendimit të Dhomës Kombëtare të Avokatisë.
Kryetari i trupit gjykues Erjon Bani paralajmëroi avokatin e Metës Bujar Musta, se në rast se në seancën e radhës nuk do paraqitën avokatët do nisë aplikimi i gjobave.
Gjykata nuk i dha fjalën të pandehurit Meta edhe pse ai e kërkoi disa herë. Pas daljes së trupit gjykues, Meta tha se nuk i ishin vënë në dispozicion 77 fashikuj të dosjes, por vetëm 55 prej tyre.
“Ç’ është kjo gjykatë i jep fjalën prokurorit dhe nuk i jep të pandehurit. Ky prokuror na ka dhënë 55 fashikuj, na mungojnë mbi 70, mungojnë faqe etj, ai është për burg”, tha Meta.
——————————-
Sqarim: Çdo person prezumohet i pafajshëm deri sa nuk vërtetohet fajësia e tij me vendim gjyqësor të formës së prerë
