LEZHE– Nxënësit e shkollës 9-vjeçare të Troshanit në Lezhë bojkotuan procesin mësimor këtë të enjte, në shenjë proteste ndaj zhvendosjes në shkollen e Krajenit, që ndodhet vetëm 7 km larg.
Te mbedhur para shkollës së Krajenit, prindërit thanë se godina nuk i plotëson kushtet si dhe mungon transporti. Ata kërkojnë që drejtoria arsimore të gjejë shkollë tjeter pritëse.
“Ne sot nuk i kemi sjellë fëmijët fare në shkollë dhe nuk do t’i sjellim as ditët e tjera sepse nuk kanë transport. Na kanë sjelle një furgon me 22 vende, ndërkohë që gjithë fshati ka 45 fëmijë. Fëmijët njëri mbi tjetrin është e pamundur të udhëtojnë në 7 km rrugë. Po kështu shkolla në Krajan s’ka ujë dhe as kushte të tjera”, thanë prindërit.
Drejtori i Arsimit në Lezhë, Hasan Muça, shpjegoi në bisede telefonike se kompania e transportit do vendosë në dispozicion dy furgonë për transportin e 45 nxënësve. Ndërsa rikonstruksioni tha ai do të vazhdojë pasi godina është e amortizuar dhe nxënësit duhet të vazhdojnë mësimin në Krajan gjatë këtij viti mësimor.
