Kryetari i grupit parlamentar të Partisë Demokratike, Gazment Bardhi, ka reaguar lidhur me mungesën e një kërkese nga Prokuroria e Posaçme për heqjen e imunitetit të zv.kryeministres Belinda Balluku.
Në një reagim të publikuar si “Dita 8”, Bardhi shprehet se edhe kjo javë është mbyllur pa një kërkesë të tillë nga SPAK. Sipas tij, mungesa e Ballukut në Parlament, në një moment kur mazhorancës i duheshin 84 vota, tregon tensionin mes saj dhe kryeministrit Edi Rama.
Bardhi pretendon se SPAK i ka dhënë në shtator tri arsyet që Rama kishte përmendur më herët lidhur me Ballukun, duke iu referuar akuzave për korrupsion, pastrim parash dhe fshehje pasurie.
Ai thekson se Prokuroria e Posaçme duhet të veprojë e pavarur nga pushteti dhe interesat politike. Në reagimin e tij, Bardhi deklaron se SPAK është mandatuar të luftojë korrupsionin dhe krimin e organizuar në nivelet më të larta.
Në fund, ai i referohet edhe sigurimit të votës së 84-t në orët e para të mëngjesit, duke pretenduar se Rama ka kaluar një “cak human”, por shton se kjo çështje nuk lidhet me Ballukun.
REAGIM I KRYETARIT TË GRUPIT PARLAMENTAR TË PD, GAZMENT BARDHI
DITA 8
Edhe kjo javë u mbyll pa kërkesën e Prokurorisë së Posaçme për heqjen e imunitetit që i hap rrugë arrestimit të Belinda Ballukut.
Mungesa e saj në Parlament, pikërisht kur PS-së i duheshin 84 vota, tregon qartë tensionin mes saj dhe Edi Ramës, i cili, në mars, rreshtoi tre arsyet për ta arrestuar dhe SPAK ia dha në shtator të tria: KORRUPSION, PASTRIM PARASH, FSHEHJE PASURIE.
SPAK-ut nuk i takon të ecë me ritmin e llogarive politike të Kryeministrit. SPAK nuk është mandatuar të presë Edi Ramën derisa të bindë Belinda Ballukun të dorëzojë mandatin.
SPAK është mandatuar të luftojë korrupsionin dhe krimin e organizuar në nivelet më të larta, i pavarur nga pushteti dhe nga interesat e tij politike.
P.S. Për sigurimin e votës së 84-t në orën 2 të mëngjesit, Edi Rama kaloi edhe një cak human që vështirë se mund të imagjinohet. Por kjo është një histori tjetër, pa lidhje me Ballukun.
