TIRANË– Biznesmeni Ergys Agasi, i arrestuar me urdhër të SPAK për dosjen me abuzimet e tenderëve të AKSHI-t, ka kërkuar lirinë në Apelin e GJKKO-së. Vetë Agasi ishte i pranishëm në seancën ku mbrojtja e tij kërkoi një masë më të lehtë sigurie se ajo e arrestit në burg.
Pasi dëgjoi palët, gjyqtari i Apeliy të Posaçëm Florjan Kalaja vendosi që vendimin ta shpallë ditën e nesërme në orën 13:00.
Ergys Agasi u arrestua pas 8 muaj arrati në Durrës. Mjeti me të cilin udhëtonte Agasi ishte piksur që në qytetin e Elbasanit dhe u ndoq për gati 40 kilometra, deri kur iu vendosën prangat në zonën e “Plepave”.
SPAK e akuzon se ishte në krye të një grupi kriminal që, përmes konkurrencës së pandershme, presioneve dhe ndikimit, paracaktonte tenderët e AKSHI-t. Ai akuzohet për të paktën 7 vepra penale.
——————————-
Sqarim: Çdo person prezumohet i pafajshëm deri sa nuk vërtetohet fajësia e tij me vendim gjyqësor të formës së prerë
