TIRANË– Drejtoresha e SHISH, Vlora Hyseni, mbërriti në GJKKO e shoqëruar me makinë policie. Pas rreth 2 orësh seancë, gjyqtarja Florela Davidi la në fuqi ndaj saj masën e sigurisë “arrest në shtëpi”, e akuzuar se ka ndihmuar biznesmenin Ergys Agasi gjatë arratisë.
Burime për Report Tv bëjnë me dije se Hyseni nuk ka bërë asnjë deklaratë gjatë seancës, ndërsa avokati i saj Kastriot Selita kërkoi një masë më të lehtë sigurie se ajo e arrestit shtëpiak. Hyseni nuk preferoi të bëjë asnjë koment, as për gazetarët si gjatë hyrjes në GJKKO, por edhe pasi doli.
Hyseni akuzohet për “nxjerrje të sekretit shtetëror” dhe “përkrahje të autorit të krimit”. SPAK gjeti 9 faqe dokumente sekrete të SHISH në makinën e Ergys Agasit, i arrestuar për aferën e AKSHI-t, të cilat dyshon se ia ka vënë në dispozicion Hyseni.
Kjo e fundit ishte pyetur më 18 shtator nga SPAK, jo për herë të parë, si person në dijeni për lidhjet me biznesmenin, por ka pretenduar se komunikimet mes tyre ishin në kuadër të bashkëpunimit të tij si informator i SHISH.
Në komunikimet e zbuluara nga SPAK dhe të raportuara nga Report Tv, gjenden mbi 500 komunikime mes Hysenit dhe Agasit, ku sipas Prokurorisë, biznesmeni diktonte dhe merrte informacionin që i duhej, informohej për takime sensitive, si dhe shkëmbenin foto e video.
Ndërkohë, më herët GJKKO la në burg Fatjon Kalluçin, shef në Laboratorin Shkencor të Policisë, dhe Embro Sulejmanin, kryekamerier në lokalin e vilave qeveritare në Durrës, të cilët akuzohen nga SPAK se ndihmuan Ergys Agasin gjatë arratisë.
Ndaj Kalluçit rëndon vepra penale e zbulimit të të dhënave sekrete te grupet kriminale. Ai dyshohet se i ka dërguar Ergys Agasit në muajin gusht, para se të arrestohej, 3 foto të ekspertizës së makinës Land Rover Defender në pronësi të tij, që u sekuestrua gjatë kontrolleve në Equos Resort.
Kryekamerieri Embro Sulejmani, i akuzuar për përkrahje të autorit të krimit, i dërgonte Ergys Agasit ushqime në banesën ku qëndronte i fshehur. Të dhënat janë zbuluar në telefonin e sekuestruar biznesmenit Agasi.
Sipas pretendimit të Sulejmanit, Agasi kishte qenë klient i tij, njësoj si shumë të tjerë, dhe ai i kishte çuar porosinë kur ia ka kërkuar, si edhe i ka rezervuar vend në lokal kur Agasi telefononte.
Lajm në përditësim…
——————————-
Sqarim: Çdo person prezumohet i pafajshëm deri sa nuk vërtetohet fajësia e tij me vendim gjyqësor të formës së prerë
Dy orë në GJKKO/ Kreu i SHISH, Vlora Hyseni del nga gjykata pa thënë asnjë fjalë (VIDEO)
Vlora Hyseni, qëndroi 2 orë në GJKKO në seancën për vlerësim e masës së sigurisë. Ish-drejtoresha e SHISH mësohet se nuk ka mbajtur asnjë qëndrim gjatë seancës. Ndërsa edhe pasi doli nga Gjykata, ku iu konfirmua masa e arrestit shtëpiak, ajo nuk bëri asnjë koment për gazetarët.
