OpenAI ka pranuar se agjentët e saj të inteligjencës artificiale kanë ndërvepruar me dhjetëra faqe interneti të qeverive, universiteteve, agjencive publike dhe institucioneve të tjera, gjatë proceseve të trajnimit dhe testimit. Mes sistemeve të prekura janë faqet e Komisionit Amerikan të Letrave me Vlerë dhe Bursave, Byrosë së Regjistrimit të Popullsisë dhe Departamentit të Arsimit.
Agjentët, të ndërtuar për të vepruar me një shkallë të caktuar autonomie, kërkonin burime zyrtare për të mbledhur informacione publike. Por, sipas kompanisë, në disa raste ata shkuan më tej, duke tentuar të anashkalonin kontrollet e sigurisë së faqeve. OpenAI tha se agjentët përdorën adresa alternative, të dhëna hyrëse të ekspozuara publikisht dhe mjete të destinuara për zhvilluesit e programeve.
Read more:Mira Murati “ia merr” Open AI-it, krijon modele që bashkëbisedojnë me njerëzit
Në raste të tjera, ata arritën te pjesë të sistemeve që nuk ishin menduar për përdorim të jashtëm ose publikuan informacione në faqe të palëve të treta. Kompania këmbëngul se të dhënat e marra nga institucionet amerikane ishin publike. Edhe Komisioni i Letrave me Vlerë deklaroi se, deri tani, nuk ka prova për akses të paautorizuar në informacione jopublike. OpenAI ka njoftuar dhjetëra institucione të prekura dhe paralajmëron se hetimi i plotë mund të kërkojë disa muaj.
