Kuvajti ka mbyllur hapësirën e tij ajrore pasi Irani njoftoi një valë të re sulmesh ndaj vendeve të Gjirit, duke rritur më tej tensionet në rajon.
Autoritetet kuvajtiane konfirmuan se disa fluturime janë devijuar drejt aeroporteve alternative, ndërsa sistemet e mbrojtjes ajrore u aktivizuan pas raportimeve për objektiva ajrore në zonë.
Situata vjen vetëm pak ditë pasi Aeroporti Ndërkombëtar i Kuvajtit u godit nga sulme ajrore iraniane, ku humbi jetën një person dhe dhjetëra të tjerë mbetën të plagosur.
Read more:Tensione të reja në Lindjen e Mesme – GJITHÇKA, MINUTË PAS MINUTE
Alarmi është përhapur edhe në vende të tjera të rajonit. Në Bahrein u aktivizuan sirenat e alarmit për raketa, pasi Irani deklaroi se kishte në shënjestër Flotën e Pestë të Marinës Amerikane, e cila ka selinë në këtë shtet.
Ndërkohë, Ambasada e SHBA-së në Jordani lëshoi një paralajmërim urgjent për qytetarët amerikanë, duke njoftuar se raketa, dronë ose mjete të tjera ajrore mund të jenë duke kaluar në hapësirën ajrore jordaneze.
Përshkallëzimi i fundit i konfliktit po rrit frikën për një zgjerim të luftës në të gjithë rajonin e Lindjes së Mesme, ndërsa vendet fqinje po marrin masa emergjente për sigurinë ajrore dhe mbrojtjen e infrastrukturës kritike.
