Një aksident i rëndë me pasojë vdekjen ka ndodhur mbrëmjen e 20 qershorit 2026, rreth orës 23:30, në aksin rrugor Lushnjë–Tiranë.
37-vjeçari Taulant Veliu, i cili po udhëtonte me biçikletë, dyshohet se fillimisht është aksidentuar nga një automjet që drejtohej nga Bledar Malaj, 41 vjeç. Më pas, ai dyshohet se është përplasur edhe nga një automjet tjetër me drejtues Florant Malo, 39 vjeç.
Për shkak të plagëve të marra, 37-vjeçari humbi jetën në vendngjarje, ndërsa 2 shoferët janë arrestuar si të dyshuar për veprën penale “Shkelja e rregullave të qarkullimit rrugor”, me pasojë vdekjen.
Njoftimi i plotë i policisë:
Më datë 20.06.2026, rreth orës 23:30, në aksin rrugor “Lushnjë–Tiranë”, shtetasi T. V., 37 vjeç, duke udhëtuar me biçikletë, dyshohet se është aksidentuar nga një automjet me drejtues shtetasin B. M., 41 vjeç, dhe më pas dyshohet se është përplasur edhe nga një automjet tjetër me drejtues shtetasin F. M., 39 vjeç.
Si pasojë e aksidentit rrugor, shtetasi T. V. ka humbur jetën në vendngjarje.
Shërbimet e Policisë kanë identifikuar dhe shoqëruar në Komisariat dy drejtuesit e automjeteve, për kryerjen e veprimeve procedurale të nevojshme, të cilët, në përfundim të veprimeve të para hetimore, janë arrestuar në flagrancë si të dyshuar për kryerjen e veprës penale “Shkelja e rregullave të qarkullimit rrugor”, me pasojë vdekjen, parashikuar nga neni 290/3 i Kodit Penal.
Grupi hetimor, nën drejtimin e Prokurorisë, vijon kryerjen e veprimeve hetimore për sqarimin dhe dokumentimin e plotë të rrethanave të aksidenti.
——————————-
Sqarim: Çdo person prezumohet i pafajshëm deri sa nuk vërtetohet fajësia e tij me vendim gjyqësor të formës së prerë.
